Recent Posts

Breaking News

BJMP 7: Covid-19 namatyan sa jail warden sa Argao


GIKOMPIRMA sa Bureau of Jail Management and Penology (BJMP) 7 nga coronavirus disease 2019 (Covid-19) ang namatyan sa jail warden sa lungsod sa Argao.

Matod ni Jail Senior Insp. Jay Ylanan, ang Health Service Division chief sa BJMP, niangkon nga wala mopahibawo si Jail Senior Insp. Francisco Pujol Jr. ngadto sa mga opisyal sa BJMP kabahin sa iyang kondisyon sa wala pa siya makabsan sa kinabuhi niadtong Hulyo 2, Huwebes.

Nipaubos sa RT-PCR swab test si Pujol ug migawas ang iyang resulta nga nagpositibo siya sa maong sakit human siya mitaliwan.

Tungod sa maong panghitabo, giabisohan ni Ylanan ang tanang jail officers nga mopahibawo sa ilang kondisyon kung makasinati kini og mga simtomas o bisan maglain lang ang lawas kinahanglan kining ipahibawo nila.

Kini aron maka-monitor sila sa kondisyon sa ilang mga kawani ug kung magpositibo man sa maong sakit mapatuman ang mga preventive measures o protocol.

Si Pujol maoy una nga namatay nga kawani sa BJMP-7.

Gawas sa Argao, dunay pito ka jail personnel nga nagpositibo sa Covid-19 sa dakbayan sa Talisay.

Ang 30 ka mga sakop sa BJMP sa dakbayan sa Talisay napaubos na sa swab test niadtong Miyerkules, Hulyo 8.

Matod ni JSinsp. Crsyrel Awe, warden sa Talisay City Jail, samtang wala pa mogawas ang resulta sa swab test sa iyang mga sakop dili una kini makauli. (KFD, BBT)


Source: Sun.Star Superbalita (https://www.sunstar.com.ph/article/1863032/Superbalita-Cebu/Balita/BJMP-7-Covid-19-namatyan-sa-jail-warden-sa-Argao?ref=rss&format=simple&link=link)

No comments