Recent Posts

Breaking News

Biyahe kulgot sa landslide


KIDAPAWAN CITY -- Mitabon ang dako nga bulto sa yuta sa kalsada nga nidahili gikan sa pangpang nga bahin sa tulo ka barangay alas 10:00 sa buntag niadtong Dominggo.

Matud ni Alamada Municipal Administrator Allan Singco nga ang landslide nahitabo sa may Barangay Bao, Malitubog ug Paruayan kon diin ang yuta mitabon sa provincial road sa North Cotabato.

Wala nay mga sakyanan nga makaagi sa kalsada lakip na ang mga molupyo sa maong dapit.

Daling milihok ang lokal nga panggamhanan sa Alamada ug naglusad og clearing operation sa mga dapit nga naapektuhan sa pagdahili sa yuta nga resulta sa adlaw-gabii nga pag-ulan nunot sa dili maayo nga lakat sa panahon.

Gipatuman sab ni Mayor Jesus Sacdalan ang force evacuation sa mga namuyo duol sa lugar nga giigo sa landslide.

Samtang nagpaabot na og hinabang ang LGU-Alamada sa mga pamilya nga naapektuhan sa insidente ug nagpadayon nga pag-ayo sa kalsada. (Edgar E. Fuerzas)


Source: Sun.Star Superbalita (https://www.sunstar.com.ph/article/1862616/Superbalita-Davao/Balita/Biyahe-kulgot-sa-landslide?ref=rss&format=simple&link=link)

No comments