Recent Posts

Breaking News

BFP 7 namatyan na og personnel tungod sa Covid-19


USA ka personnel sa Bureau of Fire Protection (BFP) 7 nga anaa madestino sa Mandaue City Fire Station ang kompirmadong patay sa Covid-19.

Samtang gihuwat pa karon ang resulta sa Reverse transcription polymerase chain reaction (RT-PCR) test sa usa ka fire marshal sa lalawigan sa Sugbo nga nakabsan usab sa iyang kinabuhi Martes sa kaadlawon, Hulyo 7.

Matod ni BFP 7 Spokesperson for Covid Fire Chief Inspector Noel Nelson Ababon nga niabot na sa 39 ka mga personnel sa BFP 7 ang kompirmado nga nagka-Covid.

Suspected pa kining fire marshal ug gahuwat pa sila sa resulta niini.

Dugang ni Ababon nga kining namatay nga personnel sa Mandaue City nakabsan kini sa iyang kinabuhi niadotng Hulyo 5 ug kasamtangan karon nga gi-lockdown ang Mandaue City Fire Station.

Sa maong mga kaso sa BFP 7, 24 niini ang anaa pa sa isolation centers samtang anaa sa 14 na ang naka-recover ug 1 ang patay.

Subay usab niining mga aduna'y positibo nga personnel, aduna'y mga fire station ug substation ang kasamtangan nga gi-lockdown.

Naglakip niini ang Mandaue, Cordova Fire Station ug ang Parian Substation sa dakbayan sa Sugbo.

Alang sa mga fire station nga naka-lockdown, ang mga silingang mga stations ang moresponde niini kon pananglitan aduna'y alarma sa sunog.

Nasabutan na kini sa pipila ka opsiyal lakip na si Fire Superintendent Fritzie Manatad, Cebu Provinvial Fire Marshal.

Sagad sa personnel nga natala nga nagpositibo anaa sa Cebu City Fire Station, samtang natala usab ang kaso sa Lapu-Lapu City Fire District, Cordova Fire Station, Talisay City Fire Station ug Consolation Fire Station.

Sa pagkakaron ang San Nicolas Fire Substation sa dakbayan sa Sugbo ang gihimo sa BFP 7 nga isolation center sa ilahang mga nagpositibo nga personnel.

Gibutyag usab ni Ababon nga sagad sa ilahang mga kompirmado nga kaso mga wala'y sintomas o asymptomatic.

Usa ning decontamination nga role sa BFP personnel karon alang sa pakigbatok sa Covid-19 sa nasod.(HBL)


Source: Sun.Star Superbalita (https://www.sunstar.com.ph/article/1862746/Superbalita-Cebu/Balita/BFP-7-namatyan-na-og-personnel-tungod-sa-Covid-19?ref=rss&format=simple&link=link)

No comments