Recent Posts

Breaking News

Barrier sa motorsiklo ipatuman


GILUGWAYAN sa Department of the Interior and Local Government (DILG) ang pagtaud og barrier sa mga motorsiklo nga sakyan sa magtiayong mag-angkasay.

Sugod sa Hulyo 27, kon dunay magtiayong mag-angkasay nga way barrier sa tunga ang ilang motorsiklo, isyuhan na sila og citation ticket.

Si DILG Secretary Eduardo Año sa Dominggo, Hulyo 19, 2020 nipahibawo nga ilang gilugwayan ang deadline sa pagtaud og safety barrier ngadto sa Hulyo 26 aron paghatag sa riders og igong higayon.

Sa Metro Manila, duna nay gipara nga motorcycle riders ug mga pasahero kay nilapas sa balaud nga magtiayon lang ang gitugtan ug kapakyas usab nila sa pagtaud og barrier.

Si Año niingon nga ang pagsikop sa mga rider nagpakita sa kamahinungdanon sa barrier kay daghan gihapong mga tawo ang nanglapas sa couple-only rule.

Sa Sabado, Hulyo 18, ang kapulisan nipara og 6,476 ka riders ug mga pasahero. Lakip na niini ang 615 ka riders nga nagtaud man tuod og barriers apan di sila magtiayon ug wa magpuyo sa usa ka balay.

“Ito ang sinasabi natin na kailangan mo talaga ng barrier kasi you cannot be very sure that they are following the law,” matod ni Año sa usa ka radio interview sa kaulohan.

Ang angkas sa motorsiklo gitugot na sugod niadtong Hulyo 10 alang sa magtiayong nagpuyo sa usa ka balay sa mga dapit nga ubos sa general community quarantine (GCQ) ug modified GCQ, apan kinahanglan magtaud og barrier sa tunga-tunga sa drayber ug pasahero.

Kinahanglan nga ang riders magtaud og face masks, wa pay labot sa helmets. Kini nga mga kondisyon gitumong aron paglikay sa pagtakod sa Sars-Cov-2, ang kagaw nga hinungdan sa coronavirus disease 2019 (Covid-19).

Duha ka prototypes ang naaprobahan. Ang usa gidesinyo ni Bohol Governor Arthur Yap samtang ang usa gidesinyo sa ride-hailing company Angkas.

Ang model sa Angkas ikabiba sa driver sama sa backpack.

Sa sayo pa, ang Motorcycle Federation of the Philippines (MFP) niingon nga ang helmets ug face masks igo na kaayong makasanta sa pagtakod sa kagaw sa angkasay sa motorsiklo.

Nipahimangno ang grupo nga ang barrier makaapekto sa balanse sa rider kon dunay kusog nga hangin ug makadaut sa riders kon dunay aksidente. (TAPM, Sunstar Philippines)


Source: Sun.Star Superbalita (https://www.sunstar.com.ph/article/1864102/Superbalita-Cebu/Balita/Barrier-sa-motorsiklo-ipatuman?ref=rss&format=simple&link=link)

No comments