Recent Posts

Breaking News

942 na ka pulis sa nasod gi-Covid; sagad frontliner


NIABOT na og 942 ang gidaghanon sa mga pulis nga nataptan og Sars-Cov-2 sa Martes, Hulyo 7, 2020.

Ang PNP Health Service nitaho sa Martes og dugang 37 ka mga kaso, lakip na sa 19 gikan sa Police Regional Office (PRO) Central Visayas, 12 gikan sa National Capital Region Police Office, duha gikan sa PRO Calabarzon ug tag usa sa PRO Central Luzon, PRO Western Visayas, National Headquarters ug PNP Finance Service.

Sa kinatibuk-an, 419 na ang naka-recover gikan sa coronavirus disease 2019 (Covid-19) samtang siyam ang nangamatay.

Ang PNP Health Service nag-monitor sa 657 ka probable cases ug 1,258 ka suspetsadong mga kaso.

Si PNP Chief Archie Gamboa sa sayo pa niingon nga sagad sa mga pulis nga nataptan sa kagaw mao ang naa sa front lines sa kagamhanan batok sa mao nga sakit.

Si Gamboa niingon nga sila nibutang og estriktong mga lakang aron malikayan ang pagkuyanap sa Covid-19 sa ilang hut-ong.

“The outbreak of the Covid-19 disease has posed great challenges globally and affected people’s daily lives and gave us far-reaching consequences beyond the spread of the disease,” siya niingon.

Ang nag-unang tahas sa kapulisan mao ang pagpatuman sa quarantine protocol. Bisan kon gilugakan na ang mga restriction sa ubang mga dapit, ang kapulisan padayong nagpatuman sa physical distancing ug minimum health standards.

Samtang, si Lieutenant General Canilo Pancratius Cascolan, PNP deputy chief for administration, niingon nga ilang limitahan ang face-to-face transactions tali sa mga sibilyan ug ilang mga personnel sa Camp Crame sa Quezon City ubang mga buhatan sa kapulisan sa nasod pinaagi sa paggamit sa digital.

Siya niingon nga ang mga kopya sa aplikasyon sa lainlaing mga transaksyon sa lainlaing units sama sa Firearms and Explosives Unit, Highway Patrol Group, Crime Laboratory ug Health Service i-upload sa ilang tagsa ka websites.

“Applicants can download and sign the documents online,” matod ni Cascolan.

Siya niingon nga ilang pahibaw-on ang mga aplikante sa schedule sa personal nga pag-atubang aron limitahan ang mga tawo sa pagsud ug gawas sa mga kampo.

Ila sab nga ipatuman ang drive-through scheme diin ang mga sibilyan nga dunay mga sakyanan mahimo rang mohug sa ilang mga transaction forms ug drop boxes sa ilang mga buhatan nga makolekta sa ilang personnel sa pagtapos sa adlaw.

Si Cascolan niingon nga ilang nahimo kining mga kausaban kay ang mga transaksyon sa PNP di masuspenso bisan kon ang nasod ubos sa community quarantine.

“This will prevent the increase (in) volume of Covid-19 cases and also make transactions easier,” siya nagkanayon. (TAPM, SunStar Philippines)


Source: Sun.Star Superbalita (https://www.sunstar.com.ph/article/1862915/Superbalita-Cebu/Balita/942-na-ka-pulis-sa-nasod-gi-Covid-sagad-frontliner?ref=rss&format=simple&link=link)

No comments