Recent Posts

Breaking News

88 ka pamilya sa Daanbantayan gi-lockdown


MOKABAT 88 ka mga pamilya ang naapektuhan sa gipatumang lockdown sa kapulisan sa Daanbantayan Huwebes sa buntag, Hulyo 2, 2020 sa Sitio Mabuhay, Barangay Poblacion, lungsod sa Daanbantayan.

Si Captain Ian Macatangay, hepe sa Daanbantayan Police Station, nga nahinabi sa Superbalita Cebu, nagkanayon nga dunay 67 ka mga panimalay ang maong sityo.

Matod pa ni Macatangay nga lima ang nasuta nga positibo sa coronavirus disease 2019 (Covid-19) sa maong sityo. Ang upat niini mga sakop sa pamilya sa driver ni Daanbantayan Mayor Sun Shimura.

Matod ni Macatangay nga dihang ilang nasuta nga daghang napositibo sa maong sityo, pinasikad sa quarantine protocol, dali silang nakig-alayon sa mga barangay opisyal pinangulohan ni Kapitan Melissa De Leon.

Si Macatangay nibutyag nga ang contract tracing nila nakatutok sa maong dapit.

Ilang gisirhan ang mga eskinita sa sityo aron mapugngan ang paggawas sa mga tawo.

Hinuon sa ilang pag-implementar sa lockdown, wala silay nasugatan nga reklamo sa mga residente.

Ang kagamhanan sa lungsod mihimo na usab og mga lakang alang sa paghatag og ayuda sa mga residente nga naapektuhan.

Si Macatangay subling miawhag sa mga residente sa ilang lungsod nga sabton ang mga lakang sa kagamhanan ug kapulisan kay alang kini sa kaayuhan nilang tanan. (GPL)


Source: Sun.Star Superbalita (https://www.sunstar.com.ph/article/1862194/Superbalita-Cebu/Balita/88-ka-pamilya-sa-Daanbantayan-gi-lockdown?ref=rss&format=simple&link=link)

No comments