Recent Posts

Breaking News

69K ka contact tracers gipakatap tibuok nasod


KAPIN sa 69,000 ka contact tracers ang gipakatap sa tibuok nasod aron pagpangita ug mahuptan ang close contacts sa mga tawo nga positibo sa Sars-CoV-2, ang kagaw nga maoy hinungdan sa coronavirus disease 2019 (Covid-19).

Nakasubay na sila og 47,474 sa 48,371 ka kompirmadong mga kaso ug sa ilang 161,975 ka close contacts, matod ni Department of the Interior and Local Government (DILG) Secretary Eduardo Año.

Sa Cebu City, si DILG spokesperson ug Undersecretary Jonathan Malaya niingon sa Dominggo, Hulyo 19, 2020, nga ang 31 ka contact tracing teams nga dunay 149 ka mga sakop nga na-assign sa Cebu City dunay 99 porsyento nga maayong epekto sa pagpugong sa pagpanakod sa kagaw.

Ang 7,589 gikan sa 7,685 ka mga kaso sa Covid-19 nasubay ug 9,828 ka contacts ang naabagan.

“We have been seeing a downward trend in the city, and this is partly because of the work of our contact tracers,” matod ni Malaya.

Sa tibuok nasod sa Hulyo 17, si Año niingon nga ang 5,215 ka tracing teams kun kinatibuk-ang 69,098 ka contact tracers, ang napakatap. Kini nihatod sa kapasidad sa contact tracing ngadto sa 98.2 porsyento.

“Our local contact tracing teams nationwide are working double-time to interrupt the transmission and reduce the spread of infection. This way, we can cover all the bases in the end-to-end trace-test-treat (T3) management system against this virus,” matod ni Año.

Sumala ni Año nga ang Mimaropa, Bicol, Zamboanga Peninsula, Caraga, ug Bangsamoro Autonomous Region of Muslim Mindanao dunay 100 porsyento nga contact tracing capability.

Ang Northern Mindanao, Western Visayas ug Cagayan Valley dunay labing ubos nga kapabilidad. Ang Northern Mindanao dunay 87.47 poryento, Western Visayas dunay 80.11 porsyento ug 74.41 porsyento sa Cagayan Valley.

Si Año niingon nga nagpaabot pa sila sa pagsaka sa contact tracers kay duna nay volunteers nga nagtanyag nga motabang sa pagpangita ug mo-monitor niadtong dunay close contacts sa dunay Covid-19 nga mga kaso.

“We are also awaiting the approval of the Department of Budget and Management (DBM) to our proposal of hiring at least 50,000 contact tracers to further intensify our contact tracing efforts,” siya niingon.

Samtang gihangop ni Año ang pagtudlo kang Baguio City Mayor Benjamin Magalong isip contact tracing czar.

Si Año niingon nga ang kaeksperto ni Magalong niini tungod sa iyang kasinatian isip pangu sa PNP Criminal Investigation and Detection Group dako kaayo og ikatabang sa tracing effort sa nasod.

“With Mayor Benjie leading the government’s contact tracing efforts, I am sure that the country’s contact tracing capability will significantly improve,” siya niingon. (TAPM, SunStar Philippines)


Source: Sun.Star Superbalita (https://www.sunstar.com.ph/article/1864091/Superbalita-Cebu/Balita/69K-ka-contact-tracers-gipakatap-tibuok-nasod?ref=rss&format=simple&link=link)

No comments