Recent Posts

Breaking News

600 mi-apply alang sa pag-survey


NAGPANON ang 600 ka mga aplikante sa Public Employment and Services Office (PESO) sa Dakbayan sa Mandaue aron mo-apply sa bakanteng mga trabaho sa Philippine Statistics Association (PSA).

Niadtong Hulyo 7, gipahibawo sa PSA ug PESO-Mandaue nga nangita sila og kapin sa 400 ka mga trabahante alang sa trabaho nga molanat og tulo ka mga buwan.

Sigon ni Musoline Suliva, nangulo sa PESO-Mandaue, nga tungod kay daghan ang mga nawad-an og trabaho karong panahon sa coronavirus disease (Covid-19), ilang nakita nga daghan ang mipahimos sa oportunidad nga gihatag sa PSA.

Sa mga madawat niining maong trabaho, sila mag-house-to-house survey. Gani, ang sweldo sa maong mga trabahante sobra sa P500 matag adlaw.

Sigon ni Suliva nga tungod kay daghan ang mihangop sa maong mga oportunidad, gisirado na nila ang pagpanawat og mga aplikante.

Alang sa mga aplikante, kinahanglan pa kini nga mopaubos sa exam nga ipahigayon sa Lunes, Hulyo 20 hangtod Hulyo 24 sa Mandaue City Public Market.

Samtang, ang 30 ka mga aplikante nga mi-apply isip supervisor gipaubos sab sa exam niadtong Biyernes, Hulyo 17, 2020.

Apan, sigon ni Suliva nga bisan kon dili madawat sa PSA, aduna pay 1,000 ka mga bakanteng trabaho gikan sa mga supermarket, call center companies, ug production companies.

Matod ni Suliva nga sa mga supermarket, nangita kini og bagger, cashier, warehouseman ug uban pa.

Gawas niini, nangita sab kini og nurse ug office staff nga mamahimong maaplayan sa mga nakagraduwar sa kolehiyo.

Ang Vallacar Transit padayon gihapong nangita og mga konduktor. Gani sigon ni Suliva nga ang mga drayber nga wa pa makabiyahe mamahimong mo-apply una isip konduktor aron sa panahon nga mangita ang maong kompaniya og drivers ma-promote kini isip usa sa mga bus drivers.

Adunay mahatag nga mga trabaho ang Peso alang ni bisan kinsa ug ang kinahanglan lang nilang buhaton nga moadto sa ilang opisina sa ikatulong andana sa Mandaue City Cultural and Sports Complex. (KFD)


Source: Sun.Star Superbalita (https://www.sunstar.com.ph/article/1864019/Superbalita-Cebu/Balita/600-mi-apply-alang-sa-pag-survey?ref=rss&format=simple&link=link)

No comments