Recent Posts

Breaking News

56 anyos gikan Makati nagka-Covid sa North Cotabato


KIDAPAWAN CITY -- Subling nakatala og confirmed case sa coronavirus disease (Covid-19) ang probinsya sa Cotabato Hulyo 6, 2020.

Ang biktima ang nagpangedaron og 56 anyos, lalaki ug nagpuyo sa Libungan, North Cotabato.

Sa taho gikan sa Department of Health (DOH)-Soccsksargen, ang pasyente dunay travel history sa Makati City.

Apil siya sa locally stranded individual (LSI) nga misakay sa sweeper flight paingon sa Cagayan de Oro City.

Gisugat ang biktima sa Task Force Sagip Stranded og gidala sa Libungan Quarantine Facility niadtong Hunyo 25.

Apan nakasinati kini og sakit nga co-morbidity: diabetes mellitus with uncontrolled blood sugar levels.

Sa diha nga gikuhaan ang 56 anyos nga lalaki sa RT-PCR test, nag-positibo kini sa Covid-19.

Gidala sab dayon ang biktima sa Cotabato Regional Medical Center sa Cotabato City para ma-monitor ang iyang blood sugar control ug ubang sakit.

Asymptomatic og anaa sa maayo nga kondisyon ang pasyente diin nagpadayon sab ang contact tracing sa mga nakauban niini.

Giklaro sab sa DOH-Soccsksargen nga wala mauban sa biktima ang iyang pamilya gumikan diretso siya nga gidala sa quarantine facility. (Edgar Fuerzas)


Source: Sun.Star Superbalita (https://www.sunstar.com.ph/article/1862742/Superbalita-Davao/Balita/56-anyos-gikan-Makati-nagka-Covid-sa-North-Cotabato?ref=rss&format=simple&link=link)

No comments