Recent Posts

Breaking News

50% sa Covid-19 patients sa Lapu naayo


GIPAHIBAWO ni Lapu-Lapu City Mayor Junard Chan nga kapin na sa 50 porsiyento ang nakarekober gikan sa coronavirus disease 2019 (Covid-19) sa dakbayan.

Gihulagway sa mayor nga maayong balita ug positibong kalamboan sa ilang pakigbatok sa Covid-19 bisan pa man og pagsaka ang kaso sa Covid-19 sa dakbayan.

Sa talaan sa kagamhanan sa mga kaso, moabot sa 1,372 ang nagpositibo sa dakbayan apan 706 niini ang nakarekober o 54 porsiyento.

Pasabot niini nga 601 na lang aktibong kaso sa dakbayan.

Moabot usab og 65 ang nakalas o namatay.

Sa kinatibuk-an, moabot sa 6 ka mga barangay sa dakbayan ang nakatala og sobra sa 100 ka kaso apan mosobra usab ang recovery sa 50 porsyento, matod ni Chan.

Labing taas nga natala nga kaso sa Covid-19 sa dakbayan mao ang Barangay Pusok (193), Gun-ob (150), Looc (141), Basak (141), Pajo (134) ug Mactan (102).

Ang Barangay Pusok usab ang dunay labing daghan nga recoveries nga miabot sa 109.

Gisundan sa Barangay Gun-ob (85), Pajo (74), Mactan (74), Basak (57) ug Looc (45).

Gibutyag sa mayor nga epektibo ang gipangbuhat sa ilang mga frontliners aron daling naayo ang nagkasakit kung basehan ang datus.

Ang isla sa Olango nagpabilin usab nga adunay labing gamay nga kaso nga moabot lang sa 7 ka kaso.

Hangyo niya sa katawhan sa padayon lang nga pagsunod sa lagda sa kagamhanan sama sa pagsul-ob og face mask, pag-obserbar sa physical ug social distancing ug labaw sa tanan magpuyo sa balay kung dili importante ang katuyoan.

“Nagpalasalamat ko ug dako sa mga doktor, nurses ug uban pang medical staff sa private ug public hospitals nga kinasing-kasing kaayong nag-atiman sa atong Covid-19 patients. Usa ako sa mga saksi kun unsa ka mapinanggaon ang atong medical frontliners ug kun unsa kadako ang ilang gigma sa trabaho isip manluluwas sa kinabuhi sa uban,” matod ni Chan sa iyang Facebook page. (GCM)


Source: Sun.Star Superbalita (https://www.sunstar.com.ph/article/1864210/Superbalita-Cebu/Balita/50-sa-Covid-19-patients-sa-Lapu-naayo?ref=rss&format=simple&link=link)

No comments