Recent Posts

Breaking News

5-anyos gi-rape, gipatay


DAVAO DE ORO -- Labihan ang pagbangutan sa pamilya sa haya sa 5-anyos nga babaye human gilugos ug gipatay sa 18-anyos nga silingan sa Purok 5, Barangay Ngan, Compostela.

Biktima mao si Isabela Jane Goc-Ong, molupyo sa nahisgutang dapit.

Sa report nga nakuha gikan sa Compostela Municipal Police Station (CMPS), nasayran nga alas 2 sa kaadlawon, Hulyo 2, 2020, nakadawat og taho ang istasyon gikan kang Kagawad Dante Castillo sa Barangay Ngan nga nagpahibalo kabahin sa napalgang patay'ng lawas sa dapit.

Daling niresponde ang kapulisan sa pagpanguna ni Police Staff Sargeant Sheryl Adjilin aron sa pagsusi sa hitabo.

Base sa inisyal nga imbestigasyon, alas 10 sa gabii, Hulyo 1, gitaho ang pagkawala sa biktima didto sa buhatan sa CMPS pinaagi sa inahan nga si Mysan Escasenas Goc-ong, 28.

Nagtuo si Mysan nga iyang anak gikuha sa ilang silingan nga ginganlan og Arman Payda, ulitawo ug way trabaho, sanglit mao kini ang nakit-an nga ulahing kauban sa biktima.

Sumala pa nga gipangita ang biktima, pinangunahan ni Kagawad Castillo uban sa mga tanod sa barangay.

Namatikdan niadtong higayona nga wala mahimutang ang suspek, busa wala madugay, miangkon kini nga iyang gituok ang biktima ug iyang gilabay sa sapa.

Daling giadtoan ang lugar ug didto napalgan ang patay'ng lawas sa 5-anyos.

Sa gihimong pakipaghinabi sa Sunstar Superbalita sa suspek sulod sa prisohan sa CMPS, giangkon niini nga iyang gipanamastamasan ang biktima sa wala pa patya.

Gisugilon sa suspek nga ang biktima iyang nakit-an sa sapa ug gipugos pagpauban luyo sa pagdumili niini ug gidala sa kalubihan.

Sa dihang gipangutana kon nganong iya kadtong nahimo, siya nitubag, "basta ako tong gibuhat."

Patay'ng lawas sa biktima gihaya sa Funeraria De Alar sa Purok 2, Poblacion sa Compostela.


Source: Sun.Star Superbalita (https://www.sunstar.com.ph/article/1862361/Superbalita-Davao/Balita/5-anyos-gi-rape-gipatay?ref=rss&format=simple&link=link)

No comments