Recent Posts

Breaking News

4 anyos nalumos atol sa birthday


Birthday party nahimong trahedya sa usa ka pamilya human ang birthay celebrant nga 4-anyos nga babaye nalumos niadtong Miyerkulis sa alas 10:30 sa buntag sa Hulyo 22, 2020 sa Virgin Beach Resort, sa Baragay Malbago, lungsod sa Daanbantayan.

Si Claire Julian Gastardo, nagpuyo sa nahisgutang lugar, dead-on-arrival (DOA) sa tambalanan.

Ang bata wa mabantayi nga nisawom sa swimming pool, matod sa pulis.

Si Police Corporal Luche Leyson sa Women and Children's Protection Desk sa Daanbantayan Police Station nga nahinabi sa Superbalita Cebu, nagkanayon nga si Razel Gastardo, 33, inahan, nibutyag nga nipauli siya kadali sa ilang balay kay naghatud og pagkaon sa iyang amahan nga masakiton.

Wa siya maghuna-huna og dautan kay naa man ang iyang usa nga anak nga si Clark, 12, uban sa mga higala, silingan ug mga kabanay nga nagpabilin sa cottage.

Apan pag-abot niya sa balay, gitawagan na siya sa iyang kabanay nga mobalik sa resort kay nalumos si Claire Julian.

Gidali nila sa pagdala ang bata sa tambalanan apan gideklarar nga DOA.

Gibutyag ni Leyson nga naghikay sila si Gastardo alang sa ika-upat nga kasumaran sa adlaw nga natawhan sa bata bisan wala ang amahan kay nagtrabaho sa Leyte.

Matod pa ni Luche nga way lifeguard ang resort nga makatabang unta sa pagbantay sa mga maligo.

Sa pag-review nila sa footage sa CCTV camera sa resort, nakita nila nga ang 4 anyos gisung-ay sa iyang maguwang nga 12 anyos, niadto sa swimming pool nga upat ka tiil ang gilawmon diin didto naligo ang mga amigo sa maguwang.

Ang maguwang mipakanaog sa iyang manghud, gibutang niya sa kilid sa swimming pool samtang siya misawom.

Wa siya makabantay nga ang iyang manghod nisawom pud pero diretso na sa pagkapa-kapa.

"Nalinga gyud sila kay ang mga kauban didto sa cottage layo ra man sa pangbata nga swimming pool. Mitidlom ang bata," dugang ni Leyson.

Sa ilang pagtan-aw sa CCTV, moabot og 15 minutos nga naunlod ang bata una pa nakit-an.

Gihulagway ni Leyson nga disgrasya ang nahitabo sanglit sa kadaghan sa mga tawo nga nangaligo, wa gilayon mabantayi ang pagkaunlod sa bata. (GPL)


Source: Sun.Star Superbalita (https://www.sunstar.com.ph/article/1864512/Superbalita-Cebu/Balita/4-anyos-nalumos-atol-sa-birthday?ref=rss&format=simple&link=link)

No comments