Recent Posts

Breaking News

3 ka mga mayor nanawagan alang sa mas estrikto nga quarantine protocol


NANAWAGAN sa mas estriktong pagsubay sa quarantine protocol ang mga kadagkoan sa mga lungsod ug siyudad nga nagpabilin sa general community quarantine (GCQ) status ubos sa lalawigan.

Tulo ka mga lugar ang ginganlan ni Presidente Rodrigo Duterte sa Hunyo 30 nga magpabilin sa GCQ tungod sa nagkataas nga mga kaso sa coronavirus disease 2019 (Covid-19).

Kini mao ang dakbayan sa Talisay, lungsod sa Minglanilla ug Consolacion.

TALISAY CITY

Wala na’y mohangyo pa ug gidawat ni Talisay City Mayor Gerald 'Samsam' Gullas ang nahiusahan nga desisyon sa Inter Agency Task Force (IATF) sa kaulohan sa quarantine status niini.

Pinaagi sa official Facebook page ni Gullas, gisaysay niini ang iyang reaksyon sa desisyon.

“The city of Talisay respects the decision of the President and the IATF. We will follow their lead,” matod ni Gullas sa Hulyo 1, 2020.

Sa 44 ka mga lungsod ug unom ka mga siyudad sa probinsya sa Sugbo, ang Talisay maoy nag-una sa labing aas nga kaso sa Covid-19.

Base sa uwahing datas sa sa Talisay nakatala kini og 291 ka mga positibong kaso sa Covid-19, 143 niini ang aktibo hinuon may 103 na nga nakarecover sa sakit.

Nagtuo si Gullas nga ang mas sayo nga detection sa kagaw o sakit maoy makatabang nga mas madali ang pagsusi ilabi na sa mga nakahimamat sa pasyente kon magpositibo kini sa pagsulay.

“Let’s not go to the hospital only when symptoms turn from bad to worse. Ayaw agwantaha ang sintomas, please report them. The key in this battle is early detection,” matod ni Gullas.

MINGLANILLA

Ang Lungsod sa Minglanilla maoy ikaduha sa listahan nga nakatala ug taas usab nga kaso sa Covid-19.

Base sa uwahing datus niini moabot 174 ka mga positibong kaso ang natala, 81 ang aktibong kaso, hinuon may 85 na nga nakarecover sa covid apan walo na ka mga indibidwal ang namatay sa sakit.

Una na nga nimando si Minglanilla Mayor Elanito Peña sa mga konstituwente niini sa kanunay nga pagsul-ob ug facemask kay kon mosupak dakpon kini sa awtoridad.

Miluwat usab siya ug kamandoan nga mao ang Executive Order No. 28 sa pagpalukat ug sellers pass alang sa mga online sellers nga motabok sa mga barangay ingon man sa lungsod.

Kini paagi aron malimitahan ang mga tawo nga moduaw sa lungsod nga possible unyang carrier sa sakit.

CONSOLACION

Susama sa dakbayan sa Talisay, nanawagan si Consolacion Mayor Joannes Alegado sa mga konstituwente niini sa pagsumbong gilayon sa barangay kon may simtomas nga gibati sama sa ubo, sip-on ug hilanat.

Matod ni Alegado, nakatampo usab sa maong desisyon mao ang nagkataas nga kaso sa lungsod ingon man lokasyon nga pinakaduol sa mga syudad nga aduna usay mga tag-as nga mga kaso.

Giawhag usab sa Mayor nga likayan ang pag tapok sa mga barangay bisan paman sa kaugalingon nga tugkaran, nga usa sa rason nga dili na makasubay sa physical distancing.

“Ato gayud i-observe ang red zones, sitio or subdivions lockdowns. Wala gayud untay laing tawo ang maka sulod sa maong mga gipang-cordon nga lugar ug ang mga naa sa sulod niining red zones dili gayud mo gawas,” matod ni Alegado sa Hulyo 1, 2020.

Ang Consolacion nakatala na ug 90 ka mga active cases, 48 na ang naka-recover samtang siyam na ang namatay.

Gihangyo sa mga kadagkoan ang kooperasyon sa mga konstituente niini aron dili na madugangan pa ang mga positibong kaso. (ANV)


Source: Sun.Star Superbalita (https://www.sunstar.com.ph/article/1862238/Superbalita-Cebu/Balita/3-ka-mga-mayor-nanawagan-alang-sa-mas-estrikto-nga-quarantine-protocol?ref=rss&format=simple&link=link)

No comments