Recent Posts

Breaking News

2K kapin nang nakadawat sa ikaduhang SAP


DUHA ka mga adlaw sa pagsugod sa pag-apod-apod, kinatibuk-ang 2,254 nga di benepisaryo sa Pantawid Pamilyang Pilipino Program (4Ps) nga panimalay sa Sugbo ang nakadawat na sa ilang cash aid ubos sa second tranche sa Social Amelioration Program (Sap) sa Dominggo, Hulyo 26, 2020.

Tumbas kini sa P13,524,000 kun mga 0.38 porsyento sa P3.6 billion budget sa 598,218 nga target family beneficiaries sa second tranche.

Ang Department of Social Welfare and Development Central Visayas (DSWD 7) niingon nga sa rehiyon, ang mga local government unit lang sa Lalawigan sa Sugbo ingon man ang mga Siyudad sa Sugbo, Mandaue ug Lapu-Lapu ang makakuha sa second emergency subsidy nga mobalor og P6,000 matag kwalipikadong pamilya.

Naapil sa unang batch sa mga LGU, nga naka-payout sa ikaduhang tranche, pinaagi sa ilang sa special disbursing officers (SDOs) sa DSWD 7, naglakip sa mga lungsod sa Alcantara, Daanbantayan, San Remegio, Tudela, Alegria, Borbon, Sogod, Ronda, ug Siyudad sa Bogo.

Si Leah Quintana, DSWD 7 information officer, niingon nangandam na usab sila alang sa sunod nga batch sa mga LGU.

Ang lungsod sa San Fernando gitakda usab nga mag-payout karong adlawa hangtod sa Huwebes, Hulyo 29 ngadto sa 30.

Samtang, ang buhatan naa na sa 97.50 porsyento sa iyang payout coverage alang sa ikaduhang tranche sa Sap cash sa 4Ps members. (WBS)


Source: Sun.Star Superbalita (https://www.sunstar.com.ph/article/1865107/Superbalita-Cebu/Balita/2K-kapin-nang-nakadawat-sa-ikaduhang-SAP?ref=rss&format=simple&link=link)

No comments