Recent Posts

Breaking News

2 ka opisyal sa Kiblawan naadik sa ilegal nga drugas?


KIBLAWAN, Davao del Sur -- Usa na sab ka opisyal sa barangay ang nasignit sa hiniusang drug bust sa Philippine Drug Enforcement Agency (PDEA)-Davao ug Kiblawan Municipal Police Station alas 11:15 sa buntag, Lunes, Hulyo 6.

Ang suspek nailhang si Roy Romaguera, 33 anyos, minyo, kagawad sa Barangay Maraga-a ning lugar.

Nasayran nga nakadawat og impormasyon ang PDEA hotline number sa Davao del Sur Provincial Office sa ilegal nga transaksyon sa suspek hinungdan nga gipailawom kini sa pag-ukoy.

Sa maong operasyon didto sa Purok 3 sa nasampit nga barangay, nakuha sa mga otoridad gikan sa posisyon sa suspek ang usa ka dako ug duha ka medium size nga pakite sa gituohang shabu.

Gibana-banang mokantidad sa P10 mil ang dakong pakite sa druga apan wa pa gikabutyag ang kantidad sa duha ka medium nga pakite.

Sumala sa PDEA-Davao nga pasakaan nila si Romaguera og kasong paglapas sa Seksyon 5 ug 11 sa Article 2 sa Republic Act 9165 kun Comprehensive Dangerous Drugs Act of 2002.

Ugaling mapamatud-an sa korte nga guilty ang opisyal sa barangay sa ilegal nga kalihokan, mahimong atubangon niini ang diskwalipikasyon sa paghupot og bisan unsang posisyon sa gobyerno.

Kahinumdoman nga nasikop sab sa mga otoridad si Kiblawan Municipal Councilor Cipriano Ponce Sarona ug duha ka kaubanan didto sa Purok 3, Barangay 6-A sa Bankerohan Public Market, dakbayan sa Davao niadtong Hunyo 13.

Naaktohan ang maong opisyal ug mga kaubanan nga nag-pot session sa stall nga iyang gi-rentahan sa Larayan 2000 sa Bankerohan.


Source: Sun.Star Superbalita (https://www.sunstar.com.ph/article/1862739/Superbalita-Davao/Balita/2-ka-opisyal-sa-Kiblawan-naadik-sa-ilegal-nga-drugas?ref=rss&format=simple&link=link)

No comments