Recent Posts

Breaking News

14 ka mga rota buksan alang sa mga PUJ


KATORSE ka mga rota ang buksan aron tadlasan sa mga public utility jeepney (PUJ) sa Lalawigan sa Sugbo ug silingang mga siyudad nga gipaubos na sa general community quarantine (GCQ).

Kini maoy gipahibawo ni Cebu Governor Gwendolyn Garcia sa Hulyo 23.

Ang maong mga rota subay sa rekomendasyon sa mga lungsod ug siyudad ubos sa pagtugot sa Land Transportation Franchising and Regulatory Board (LTFRB).

Kini mao ang mga rota: Mandaue-Liloan; Lutopan- Poblacion, Toledo; Talisay-Naga; Talisay- Minglanilla; Talisay-San Fernando; Lapu-Lapu City – Mandaue- Lapu-Lapu City; Punta EngaƱo – Mandaue; Marigondon-Mandaue; Danao-Mandaue; Danao- Sogod; Consolacion-Danao; Consolacion-Mandaue; Compostela-Mandaue; ug Cordova-Mandaue.

Matod ni Garcia nga aron makadagan ang mga jeepney sa maong mga rota, gikinahanglan nga masusi una ang mga sakyanan sa Land Transportation Office (LTO) ug LTFRB.

"Aron matagaan mo og permit mismo ang LTO ug LTFRB maoy moadto sa inyong mga lugar aron pag- inspect sa inyong unit. And once the unit is found to be road worthy, then ma-issuehan dayon mo ana og special permit," matod ni Garcia.

Gilaoman nga sa sunod semana makabalik na og dagan ang mga PUJ.

Apan gipasabot ni Garcia nga di tanan ang makadagan kay magdepende lang kon kinsa ang makapasar sa pagsusi sa mga opisyal sa nahisgutang ahensya.

Tungod niini, giawhag usab ni Garcia ang mga local chief executive sa mga lungsod pagrekomendar sa LTFRB og dugang rota aron maka byahe ang mga PUJ.

"We are calling on our LGUs, our local chief executives to recommend whatever necessary additional routes that you may wish to have to the LTFRB," dugang sa gobernador. (ANV)


Source: Sun.Star Superbalita (https://www.sunstar.com.ph/article/1864575/Superbalita-Cebu/Balita/14-ka-mga-rota-buksan-alang-sa-mga-PUJ?ref=rss&format=simple&link=link)

No comments