Recent Posts

Breaking News

13 terorista nga gikapoy na og tago nisurender


COTABATO CITY -- Gikapoy na sa pagtago-tago ug gusto na sab nga manginabuhi nga malinawon, 13 ka terorista ubos sa Bangsamoro Islamic Freedom Fighters (BIFF) misurender ngadto sa militar ug gipresentar sa publiko alas 2:00 sa hapon niadtong Miyerkules.

Nasayran gikan kang 6th Infantry (Kampilan) Division Chief, Major General Diosdado Carreon, nga ang mga terorista nisurender ngadto sa puwersa sa 33rd Infantry (Makabayan) Battalion, Philippine Army sa Maguindanao Province.

Mga nahisgutan pulos mga sakop ni Kumander Ustadz Karialan, ilawom sa Karialan Faction nga giingong naglihok sa mga lungsod Shariff Aguak, Mamasapano, Rajah Buayan, Shariff Saydona Mustapha ug Sultan Sabarongis sa nahisgutang probinsiya.

Dala sa 13 ka BIFF sa ilang pagsurender ang mga tag-as nga matang sa armas, bala, magazine, kagamitan sa paggama og bomba, lakip na mga improvised explosive device.

Nagpasalamat sab si 1st Mechanized Brigade Commander Colonel Jesus Atencio sa mga lokal opisyal sa probinsiya nga mitabang sa negosasyon sa pagsurender sa mga nahisgutan.

Mipasalig ang mga mitahan nga moabag sa militar ug kapulisan sa pagpatunhay sa kalinaw sa probinsiya kung diin nakadawat og tabang pinansiyal ug livelihood assistance. (Edgar E. Fuerzas)


Source: Sun.Star Superbalita (https://www.sunstar.com.ph/article/1863738/Superbalita-Davao/Balita/13-terorista-nga-gikapoy-na-og-tago-nisurender?ref=rss&format=simple&link=link)

No comments