Recent Posts

Breaking News

11 higayon nanglugos nasignit; way piyansa sa korte


DIGOS CITY -- Usa ka 31-anyos nga lalaki ang gisikop sa kapulisan human miguwa ang orden de aresto batok kaniya sa 11 ka ihap sa kasong pagpanglugos.

Ang suspek nadakpan sa iya mismong pinuy-anan sa Brgy. San Miguel, alas 3:00 sa hapon, Lunes, Hulyo 27.

Si Lieutenant Col. Vici Anthony Tababa, hepe sa Digos City Police Station (DCPS), nag-ila sa suspek nga mao si Leonielle Mangaron, molupyo sa lugar.

Matud ni Tababa nga gikan sa Regional Trial Court (RTC) Branch 19 ang warrant of arrest batok sa suspek ug gilagdaan ni Executive Judge Carmelita Sarno-Davin niadtong Hulyo 22, tuig kasamtangan.

Subay sa maong orden de aresto, giatubang sa suspek ang mga kasong rape by sexual assault, statutory rape ug qualified rape.

Sanglit way girekomendang piyansa ang kasong giatubang, diretsong gipadlak ang suspek sa selda sa DCPS samtang nagpaabot sa commitment order gikan sa korte.


Source: Sun.Star Superbalita (https://www.sunstar.com.ph/article/1865155/Superbalita-Davao/Balita/11-higayon-nanglugos-nasignit-way-piyansa-sa-korte?ref=rss&format=simple&link=link)

No comments