Recent Posts

Breaking News

Way total lockdown - Cimatu


GIKLARO ni Secretary Roy Cimatu nga way ipatuman nga total lockdown sa dakbayan sa Sugbo sukwahi sa mga mikatap sa social media nga giingong paagi aron mapugngan ang pagkatap sa Covid-19.

Si Cimatu ang miduaw sa Sugbo kagahapon, Hunyo 23, 2020 uban sa laing Cabinet members nga sila si: Health Secretary Francisco Duque III, Interior and Local Goverment Secretary Eduardo Año, IATF-EID chief implementer Carlito Galvez ug Defense Secretary Delfin Lorenzana nga maoy gipadala ni Presidente Rodrigo Duterte pagtabang sa dakbayan ug lalawigan aron maminosan kon dili man masugpo ang pagkatap sa makamatay nga virus.

Si Cimatu nga maoy nangulo sa task force nipahibawo nga personal nga moduaw ngadto sa mga barangay nga adunay daghang aktibo nga kaso ug makighinabi sa mga barangay kapitan.

WAY MILITARY FORCE

Gisalikway usab ni Cimatu, kanhi chief of staff sa Armed Forces of the Philippines, nga pabahaan og tropa sa militar ug kapulisan aron ipatuman ang health protocol.

Matod pa atol sa atol sa maong IATF meeting nga dili tanang Sugbuanon ang ECQ violators ug siya nagtuo nga kon ilang masabtan ang katuyoan sa gobyerno nga alang kini sa ilang kaayohan sa higayon nga motuman lang.

Ang pangulo sa task force niingon nga dili siya buot nga moabot sa punto nga mogamit og pwersa ang military ug pulis aron ikapatuman ang mga lagda s IATF sanglit siya nagtuo nga dali ra makabangon ang dakbayan ug lalawigan pinaagi sa kooperasyon sa katawhan.

Sila si Lorenzana, Cimatu, Duque, Año ug Galvez kinsa giabi-abi ni Secretary Michael Dino ang makigtambayayong sa local officials ug sayran unsay ilang mga problema sa grassroots para mahatagan og solusyon.

Si Año sa DILG nagkanayon nga nakigpulong sila nilang Cebu City Mayor Edgardo Labella, Cebu Governor Gwendolyn Garcia, Tailsay City Mayor Gerald Anthony Gullas, DOH 7 Regional Director Jaime Bernadas ug ubang mga opisyal aron hisgotan ang ilang hiniusang lakang batok Covid-19.

MOGIYA LANG

Ang Secretary sa National Defense nga si Lorenzana nibutyag nga ania sila sa Sugbo para maoy mo-oversee ug mohatag sa mga gikinahanglan para masugpo ang Covid-19 nga gidasonan usab ni Galvez kinsa nibutyag nga nakapadala na sila og libuan ka PPE’s, N95 masks ug PCR machines.

Sa Cebu City, gipadayag ni Labella nga padayon ang operasyon sa lima ka clustered clinic nga maoy moatiman sa mga influenza like illness sa 80 ka barangay.

Gipadayag usab ni Labella nga matag clustered clinic, adunay tag-lima ka contact tracing team ug magpadayon usab ang testing

Si Labella niingon nga dili niya igsapayan kon ang pagsige og test sa Cebu City maoy hinungdan sa pagsaka sa daghang kaso basta masuta niini ang epekto sa pandemic dala sa virus.

Ang lima ka Cabinet secretaries nagtuo nga kon mosunod ang mga Sugbuanon nga gihulagway ni Duterte nga gahi og ulo ug kompyansa ra batok sa Covid-19, ang Cebu City makalampos gikan sa ECQ ngadto sa mas luag nga quarantine classification ug mao usab ang habig sa lalawigan sa Sugbo. (PAC)


Source: Sun.Star Superbalita (https://www.sunstar.com.ph/article/1861176/Superbalita-Cebu/Balita/Way-total-lockdown-Cimatu?ref=rss&format=simple&link=link)

No comments