Recent Posts

Breaking News

Ugangan gipatay sa iyang umagad sa Sogod


UGANGAN patay kay gidunggab sa iyang umagad dihang nanuok tungod sa kahubog niadtong Sabado, Hunyo 27, sa alas 7:00 sa gabii didto sa Brgy. Bagatayam, lungsod sa Sogod.

Si Roberto Brigoli, 60, patay human nakaangkon og samad dinunggaban sa iyang lawas.

Nasikop ang umagad nga si Jemil Comaingking, 22, ug mag-uuma sa maong lugar.

Si Police Staff Sgt. Julius Navarro sa Sogod Police Station nga nahinabi sa Superbalita Cebu, niingon nga ang biktima ug suspek nagtagay sa gawas sa ilang panimalay.

Dihang nangahubog na sila, nagkaaway sila ug naglagot ang biktima nga nagtubagtubag ang suspetsado.

Usa nila ka silingan nga si Jason Hodaya, nibutyag nga nakit-an niya nga gituok sa biktima ang suspetsado hinungdan nga ilang giuwang.

Human mauwang, ang suspetsado nakakupot sa kutsilyo ug gidunggab ang biktima hinungdan nga namatay kay nakaangkon og upat ka samad dinungaban. (GPL)


Source: Sun.Star Superbalita (https://www.sunstar.com.ph/article/1861754/Superbalita-Cebu/Balita/Ugangan-gipatay-sa-iyang-umagad-sa-Sogod?ref=rss&format=simple&link=link)

No comments