Recent Posts

Breaking News

Transakisyon sa druga sa compound sa simbahan


BALAANG dapit, ang simbahan sa Barangay Guadalupe, siyudad sa Sugbo maoy gipahigayonan sa transaksyon sa mga tigpayuhot sa gidiling drugas.

Nabutyag kini human sila si Gino Señires, 20, ug Dithier Gonzaga, 18, mga molupyo sa Oppra sa Barangay Kalunasan, siyudad sa sugbo ang nadakpan sa mga sakop sa Philippine Drug Enforcement Agency (PDEA) 7 niadtong Biyernes sa hapon, Hunyo 5.

Gihimo ang panagsabot tali na sa mga ahente sa PDEA -7 ug Guadalupe Police Station ngadto na sa ilang posuer buyer nga anha magtagbo sa may simbahan.

Matod ni IA1 Jessie Cabutotan, nangu sa operasyon, si Gino mismo ang namugos nga adto lang sulod sa compound sa simbahan sa Guadalupe sila mag-abot base sa sabot sa ilang poseur buyer.

Rason sa mga dinakpan tungod aron walay magduda nga drugas ang ilang dala ug wala usab magtuo ang duha nga mga ahente sa PDEA 7 ang ilang gikasabot.

Atol sa pagronda, nasakmit gikan sa mga dinakpan ang moabot na sa 100 gramos nga shabu nga dunay kantidad kapin sa P500,000.

Dugang ni Cabutotan nga si Señires ang ilang target samtang si Gonzaga ang kauban uban niini. Gihulagway sa PDEA -7 nga si Señires makonsiderar nga high value target.

Matod ni Leia Alcantara, tigpamaba sa PDEA 7, si Señires gi-monitor sulod sa usa ka semana ug nasuta nga maka-deliver og shabu ngadto na sa ilang mga suki nga moabot na og duha ka kilo sa shabu matag bulan.

Samtang mga dinakpan mihimakak nga ila kadtong shabu nga nasakmit kondi gisugo ra sila sa laing tawo nga wa nila gibutyag. (BBT)


Source: Sun.Star Superbalita (https://www.sunstar.com.ph/article/1859284/Superbalita-Cebu/Balita/Transakisyon-sa-druga-sa-compound-sa-simbahan?ref=rss&format=simple&link=link)

No comments