Recent Posts

Breaking News

Trabahante nagaling sa mixer, patay


USA ka construction worker ang patay human natagak ug naapil sa pagkagaling sa mixer sa construction site sa Barangay Tapon, lungsod sa Dumanjug, Sugbo niadtong Hunyo 4 sa gabii.

Ang kapulisan niila sa biktima nga si Mariano Barrios, 49, minyo, ug taga Bais City, Negros Oriental, nagtrabaho isip helper sa QM Builders Construction.

Apan ang kapulisan nipalawom sa ilang imbestigasyon kay wa nila isalikway ang posibilidad nga dunay foulplay ang kamatayon sa biktima.

Si Major Ardioleto Cabagnot, hepe sa Dumanjug Police Station nga nahinabi sa Superbalita Cebu, nagkanayon nga ilang gipalawman ang imbestigasyon aron mahanaw ang pagduda nga dunay foulplay ang kamatayon sa biktima.

Si Barrios gidala sa usa sa mga tambalanan sa dakbayan sa Sugbo, apan nabugtoan sa iyang kinabuhi sa pagka Hunyo 5, apan nataho sa kapulisan pagka Dominggo na sa buntag, Hunyo 7.

Gipasabot niini nga taas ang panahon sa pag-report unta sa maong insidente. Apan wala gihimo sa nahingtungdan diha pa nga mangayo silag police report alang sa pagbiyahe sa lawas sa namatay paingon sa Negros.

Usa ka Jayjay Bagayo, 35, minyo, plant operator sa QM Builders, maoy nipahibalo sa insidente sa kapulisan Dominggo sa buntag.

Gisaysay niini nga dunay ongoing concreting sa batching plant sa compound sa ilang gitrabahoan.

Wa nila mabantayi nga nisaka ang biktima sa taas nanglimpiyo sa central mixer, gituohang nadakin-as ang biktima, natagak ug naapil sa pagkamasa nagaling uban sa semento, bas, ug graba.

Si Bagayo, nga nakadungog sa kusog nga singgit sa biktima nangayog tabang. Hinungdan nga gidali niya sa pagpindot ang emergency stop sa central mixer samtang nakita ang biktima nga naapil sa pagkamasa.

Si Barrios gikatahong nabalian sa duha ka tiil, dughan ingon man grabing bun-og sa ulo.

Matod ni Cabagnot, dunay negligence sa habig sa operator sa planta kay wa niya gisiguro nga walay tawo nga mosaka didto sa taas.

“Gipalawman nato ang imbestigasyon kay basin may mga grudges, ato gipakuhaag dugang impormasyon sa imbestigador, dugay nila na-report. Makita nato dunay negligence sa part sa operator gisiguro unta niya nga walay tawo,” dugang ni Cabagnot. (GPL)


Source: Sun.Star Superbalita (https://www.sunstar.com.ph/article/1859302/Superbalita-Cebu/Balita/Trabahante-nagaling-sa-mixer-patay?ref=rss&format=simple&link=link)

No comments