Recent Posts

Breaking News

Tanod gitabangan og kulata, kritikal


Talandugon ang kahimtang sa usa ka barangay tanod human gitabangan pagdunggab ug gibunalan sa amahan ug anak nga silingan ala 1 sa kaadlawon sa Biyernes, Hunyo 12, 2020, sa Sitio Kalubihan, Barangay Carmelo, lungsod sa Tuburan, Cebu.

Si Timoteo Milano, 49, minyo, tanod sa Barangay Carmelo, nakaangkon og samad dinungaban sa dughan, ingon man bun-og sa kalawasan human gibunalbunalan.

Nasikop sila si Joel Abog, 49, mananagat, ug iyang anak nga lalakeng 17 anyos.

Si Police Corporal Charben Sapio sa Tuburan Police Station nga nahinabi sa Superbalita Cebu nagkanayon nga hubog si Abog, kinsa nagdala og kutsilyo samtang back-up ang iyang menor nga anak nagdala og bunal nga kahoy.

Ilang gipangita si Milano ug nasugatan samtang naglakaw niadtong higayuna nga padulong mopauli sa iyang balay.

Gihamagan gilayon sa amahan ug anak. Human sa krimen nisibat ang mga Abog, apan nadakpan sa follow up operation sa kapulisan.

Ang biktima nadala sa tambalanan. Si Sapio nibutyag nga ang karaang panagbangi tali sa mga Abog ang motibo sa kremin.


Source: Sun.Star Superbalita (https://www.sunstar.com.ph/article/1859918/Superbalita-Cebu/Balita/Tanod-gitabangan-og-kulata-kritikal?ref=rss&format=simple&link=link)

No comments