Recent Posts

Breaking News

Sugbo wa magkuwang og nurse, doktor


DILI mopakatap og dugang nurse ug doktor ang Department of Health (DOH) sa Sugbo tungod kay igo pa ang anaa karon subay niining pakigbatok sa nasod sa Covid-19.

Matod ni Secretary Francisco Duque III nga walay kakuwang sa nurse ug doctor sa Sugbo hinungdan nga wala ray angay nga i-deploy nga nars ug doktor sa Sugbo.

Kini giklaro sa kalihim atol sa iyang pagbisita sa Sugbo kagahapon, Hunyo 23, human sila gipadala ni Presidente Rodrigo Duterte aron pagsuta sa sitwasyon sa Covid-19 sa dakbayan ug lalawigan sa Sugbo.

“There seems to be no indication of that as of the moment because I understand that DOH CHD 7 has already complimented the human resource for health requirement of many of the private hospitals after of course having satisfied the HR requirement itself of our public facilities like the Vicente Sotto,” si Duque nagkanayon.

Misegunda usab si DOH 7 Regional Director Jaime Bernadas kabahin niini ug miklaro nga aduna na silay gipakatap nga 147 ka mga nars sa tulo ka infirmaries nga gitukod sa Sugbo ug sa pribado nga mga tambalanan.

Ang pagdugang gihimo sa rehiyon dungan sa mga gipangtukod nga infirmaries susama sa Cebu City Quarantine Center ug sa duha ka Bayanihan Cebau Field Centers.

Ang DOH 7 mao ang nag-sweldo sa maong mga nurse. Giklaro usab ni Bernadas nga wala pa hingpit nga nagnihit og doktor ang mga pribado nga tambalanan tungod kay igo pa kini.

Apan nakadawat na sila og request gikan sa Cebu Doctors’ Hospital ug andam kini modawat sa mga under board nga doktor nga ready na i-deploy.

Lima ka mga under board doctors ang unang gihangyo sa Cebu Doctors’ Hospital ngadto sa DOH 7.

Atol usab sa pagbisita sa Sugbo ni Duque gibutyag niini nga tulo na ka mga pribado nga tambalanan ang mihimo na niining Hybrid Therapeutic Plasma Exchange ug Convalescent Plasma Therapy sa Sugbo.

“It is premature to give any conclusion or judgment as to efficacy of both the plasma exchange therapy as well as the plasma convalascent therapy,” si Duque nagkanayon. Wala usab direkta nga mitubag si Duque kon suportado sa iyang ahensiya ang maong lakang sa pagtambal niining mga kritial ang kondisyon sa Covid-19. (HBL)


Source: Sun.Star Superbalita (https://www.sunstar.com.ph/article/1861173/Superbalita-Cebu/Balita/Sugbo-wa-magkuwang-og-nurse-doktor?ref=rss&format=simple&link=link)

No comments