Recent Posts

Breaking News

Rehistro sa biseklita gibaraw ni Labella


GISUSPENSO ni Cebu City Mayor Edgardo Labella ang mandatory nga pagparehistro sa mga biseklita ug ang pagdili sa maong two-wheeled nga sakyanan sa pagpadagan sa mga karsada sa Siyudad sugod Hunyo 6, 2020.

Gisuspenso sab ni Labella ang requirement nga driver’s identification sa mga driver sa public utility vehicles nga nagbiyahe sa mga karsada sa syudad.

“Taking into consideration the welfare of the Cebuanos, the requirement on mandatory registration of bicycles and prohibition of their use in Cebu City streets are suspended indefinitely, effective today. Further, requirement of driver’s ID for drivers of public utility vehicles plying Cebu City streets are likewise suspended indefinitely,” segun ni Labella sa iyang Facebook post, hapon sa Hunyo 6.

Gitahasan ni Labella ang Cebu City Transportation Office (CCTO) nga iimplementar ang iyang mga mando.

Iya usab nga gipa-facilitate ang operasyon sa tanang klase sa sakyanan nga nagbiyahe sa syudad nga adunay special permits gikan sa Land Transportation Franchising and Regulatory Board (LTFRB).

AYAW PAG-ESTRIKTO

Si Cebu City Councilor Antonio Cuenco, kinsa chairman sa committee on transportation, niapelar sa mga traffic enforcer nga luagan lang usa ug tugutan ang publiko sa paggamit sa ilang mga biseklita ug motorsiklo.

“I am appealing to LTO (Land Transportation Office) and other agencies to allow in the meantime this mode of transportation even if the owner has no license yet,” matod ni Cuenco.

Matod ni Cuenco nga adunay ordinansa nga gipasar sa Cebu City nga nagmando nga kinahanglan iparehistro ang mga bisekleta, apan wa naimplementar.

Mao kining ordinansaha ang gibasehan sa CCTO nga nagtud sa maong departamento nga ipahinumdum sa mga biker nga iparehistro ang ilang mga bisekleta para sa ilang safety.

Tungod sa “new normal,” kadaghanan sa publiko maggamit na og bisekleta sa pag-adto sa ilang mga trabahoan.

Niadtong 2011 sa panahon ni kanhi mayor ug karon Bise Mayor MIchael Rama ipatuman unta sa CCTO ang mao nga ordinansa.

Apan gisupak kini sa daghang bike organizations kay “anti-poor” ug way kapuslanan bisan kon giingon nga makapanalipod kini sa pagpangawat.

Matod sa mga bike organization, maayo unta kon tibuok Sugbo naa ani nga ordinansa.

Kon ang bike nga gikawat igawas sa Cebu City, di gihapon kini masubay.

Naa say mga leisure biker nga nanag-iya mahalong mga biseklita, ang uban di mominos og P100,000, nga papitlan og sticker ang ilang unit.

Tungod sa pag-apelar sa daghang bike organizations, wa kini idayon sa pagpatuman.

Sa lahi nga interbyu, oras sa pag-post si Labella nga isuspenso ang bike registration, nitambag ang tigpamaba sa CCTO nga si Ronnie Nadera ngadto sa mga biker nga iparehistro ang ilang mga bike subay sa ordinansa ug para sad sa ilang safety.

Para sa mga gusto magrehistro, mamahimong mobisita ang aplikante ngadto sa building sa CCTO billing section nga anaa sa F. Ramos St., duol sa Ramos Public Market.

Magdala sa ilang proof of purchase o barangay certificate nga nagpamatuod nga gipanag-iya sa aplikante ang bisekleta.

Aduna usay bayranan nga P20 para sa regular fee ug laing P20 para sa sticker.

Matud ni Nadera nga ang registration number magpakita nga kini ang nananag-iya sa bisekleta, ug para sa safety reasons kon makawat ang bisekleta.

Gipahinumdum ni Nadera nga magsul-ob og protective gear ang mga biker sama sa helmet ug knee pad.

Iya usab giawhag ang mga biker nga di magpatunga sa dalan aron malikayan ang aksidente. (Dugang taho ni REV)


Source: Sun.Star Superbalita (https://www.sunstar.com.ph/article/1859210/Superbalita-Cebu/Balita/Rehistro-sa-biseklita-gibaraw-ni-Labella?ref=rss&format=simple&link=link)

No comments