Recent Posts

Breaking News

Pusta wa maayog bahig, mag-uuma gidunggab


Mag-uuma nadunggaban sa iyang ig-agaw human sila nagkabangi sa pusta sa volleyball alas 7 sa buntag sa Biyernes sa Brgy. Tabon, lungsod sa Dalaguete.

Si Crisencio Gelardo, 30, ulitawo, samdan sa iyang lawas, samtang nasikop ang igagaw nga si Martin Gelardo, 21, mag-uuma.

Si Police Corporal Rex Pelonio, sa Dalaguete Police station nga nahinani sa Superbalita Cebu, nagkanayon nga sila si Crisencio ug Martin nag-inom Huwebes sa gabii.

Dihang nangahubog, ilang nahisgutan ang karaang panagbangi, apan nahilot ra sa ilang mga kauban sa inom.

Apan kagahapon sa buntag giingon nga hubog gihapon si Martin, iyang gidunggab si Crisencio nga naglingkod sa tindahan sa ilang silingan.

Si Crisencio wa makabantay dayon sa iyang ig-gaw nga niabot sa tindahan.

“Ang suspetsado mitug-an nga naglagot siya sa iyang igagaw tungod sa pusta niini sa volleyball nga wa matarong pagbahin,” dugang ni Pelonio.

Si Martin nasikop sa mga tanod, gi-turnover sa kapulisan samtang si Crisencio gidala sa tambalanan sa Dalaguete, apan gitakdang ibalhin sa tambalanan sa Dakbayan sa Sugbo.

Ang biktima naa sa kritikal nga kahimtang tungod sa duha ka mga samad dinunggaban sa lawas. / GPL


Source: Sun.Star Superbalita (https://www.sunstar.com.ph/article/1859130/Superbalita-Cebu/Balita/Pusta-wa-maayog-bahig-mag-uuma-gidunggab?ref=rss&format=simple&link=link)

No comments