Recent Posts

Breaking News

Physical distancing sa flag raising ceremony sa Adlaw sa Kagawasan


USA ka yanong flag raising ceremony ang ipahigayon sa kagamhanan sa dakbayan sa Lapu-Lapu isip pagtimaan sa ika-122 nga Adlaw sa Kagawasan sa nasod, Biyernes, Hunyo 12.

Apan sukwahi sa miaging kasaulogan limitado lang ang gimandoang mopatim-aw sa naasoyng kalihukan.

Kini gumikan kay anaa pa man sa general community quarantine (GCQ) ang dakbayan.

Kini aron usab kalikayan ang pagdasok sa mga kawani sa atubangan sa City Hall diin ipahigayong ang simpleng kalihukan sa alas 8:00 sa buntag karon.

Sa usa ka memorandum nga giluwatan ni City Administrator Danilo Almendras, bugtong mga department head, assistant department head ug pangulo sa ubang buhatan sa dakbayan ang gimandoan sa pagtambong sa naasoyng kalihukan.

Barong tagalog ang kinahanglan isul-ob sa mga lalake samtang Filipiniana sa mga babaye alang sa naasoyng ka lihukan.

Ang ma tag usa magsul-ob usab og face mask. Gawas kanila, ang ubang kawani gimandoan sa pagpuyo sa tagsatagsa ka panimalay ug dili na moadto sa City Hall.

Susama usab nga lagda ang pagasundon sa kagamhanan karong Hunyo 17, Miyerkules, nga mao ang 59th Charter Day sa dakbayan.

Apan inay nga Barong Tagalog ug Filipiniana ang isul-ob sa naasoyng adlaw, ang ila nang uniporme sa City Hall matag Lunes ang ipasul-ob sa manambong nga kawani.

Sa gihapon, ang dili department head, assistant department head ug pangulo sa mga buhatan sa kagamhanan giawhag sa pagpuyo gihapon sa ilang tagsatagsa ka panimalay.

Usa usab ka hamubong programa nga pangulohan ni LapuLapu City Mayor Junard “Ahong” Chan ang isunod human sa flag raising ceremony karong adlawa ug sa ilang Charter Say sa mosunod nga semana. / GCM


Source: Sun.Star Superbalita (https://www.sunstar.com.ph/article/1859850/Superbalita-Cebu/Balita/Physical-distancing-sa-flag-raising-ceremony-sa-Adlaw-sa-Kagawasan?ref=rss&format=simple&link=link)

No comments