Recent Posts

Breaking News

Party maduguon; 52 anyos gipatay sa ig-agaw


BIRTHDAY party nahimong madugoon dihang manag-agaw nga hubog nag-away, usa niini natigbasan patay sa Biyernes sa alas 3 sa hapon, Hunyo 5, 2020 sa Sitio Nagbalik Purok 2, Brgy. Manlum, lungsod sa Oslob.

Si Paulino Ampoon, 52, minyo, mag-uuma nagpuyo sa nahisgutang lugar, namatay human gitigbas sa iyang ig-agaw nga si Christopher Ampoon, 25, mag-uuma, dunay kapuyo.

Si Police Captain Clemente Ceralde, Jr., hepe sa Oslob Police Station nga nahinabi sa Superbalita Cebu, nagkanayon nga si Paulino uban kang Christopher ningtambong og birthday party sa ilang paryente.

Ang kalipay sa pamilya sa kinantahay sa videoke nabulabog dihang nagkalalis sila si Paulino ug Christopher nga nangahubog na.

Matod ni Ceralde nga dihang nangahubog na ang duha, ilang nahisgutan ang panagbangi.

Bisan kon giuwang sa mga kabanay, silang duha nagsinumbagay. Si Christopher nalupig, nidagan pauli sa ilang balay.

Si Paulino nigukod, niabot sa balay ni Christopher, kinsa nikuha og sanggot ug gitigbas sa makadaghan ang biktima.

Si Christopher nadakpan sa miresponding mga pulis.

Kasong homicide ang ipasaka batok kang Christopher.

GIDUNGGAB

Samtang, talandugon ang kahimtang sa usa ka negosyante human siya giluba sa iyang driver, kinsa hubog mga alas 9:40 sa gabii sa Biyernes sa Purok Indian Tree, Brgy. Mano, lungsod sa San Remegio.

Si Eleazar Mahinay, 56, minyo, negusyante og agrivet sa maong dapit, samdan sa tuong dughan ug wala nga bahin sa hawak.

Nasikop si Antonio Tayong, 42, minyo, nagpuyo sa nahisgutang lugar, driver sa truck sa biktima. Si Police Captain Elpidio Taho-an, Jr., hepe sa San Remegio Police Station nga nahinabi sa Superbalita Cebu, nagkanayon nga si Tayong nagtagay uban sa helper atubangan sa balay ni Mahinay.

Sa pag-abot ni Mahinay, iyang gikomprontasi si Tayong kabahin sa iyang trabaho.

Tungod sa kainit sa ilang panaglalis, si Tayong nikuhag kusilyo, gidunggab si Mahinay makaduha ka mga higayon.

Si Mahinay gidala sa tambalanan sa dakbayan sa Bogo, apan kay talandugon ang kahimtang, gibalhin sa tambalan sa Dakbayan sa Sugbo.

“Siyempre, amo gud ni siya. Dunay mga instruction nga wa siguro matuman sa suspetsado, natural nga makasab-an. Pero gikasagmuyo niini, iyang gidunggab,” dugang ni Tago-an.

Hinuon, si Tayong nitahan dayon sa kapulisan.


Source: Sun.Star Superbalita (https://www.sunstar.com.ph/article/1859204/Superbalita-Cebu/Balita/Party-maduguon-52-anyos-gipatay-sa-ig-agaw?ref=rss&format=simple&link=link)

No comments