Recent Posts

Breaking News

Panginabuhi panahon sa Covid-19


DAVAO DEL SUR -- Nakapabor ang ubang drayber sa traysikel human nahimo nilang panginabuhian ang epekto sa coronavirus disease (Covid-19).

Sa Siyudad sa Digos, nag-atang na daan ang mga drayber ug traysikel sanglit daghang pasahero gikan sa Digos City Overland Transport Terminal ang magpahatod sa nagkalaing destinasyon.

Sanglit wa pa’y byahe sa ubang parte sa lalawiga. Ang mga traysikel ug motorsiklo mao'y alternatibong kasakyan sa mga moabot nga pasahero gikan sa Davao City.

Giklaro sa drayber nga si Vincent Malaza nga nagpabilin ang P10 nga pletahan kon sa sentrong parte lamang sa Digos ang ilang destinasyon.

Moabot sa P150 o depende sa gilay-on ang singil sa pletehan sa usa ka pasahero sanglit “pakyaw” ang ilang sabot.

Gipatuman sab sa siyudad ang tag-usa lamang ka angkas sa motorsiklo ug duha ka pasahero sa mga traysikel.

Matod ni Alfyd CampaƱa, 24-anyos nga drayber sa Warik-warik, anaa sa P400 ang ilang singil sa pasahero nga ihatod gikan Digos City padung sa Baluyan sa Sarangani Province, ug P500 sab gikan sa siyudad padung sa Barangay Kinuskusan, Bansalan, Davao del Sur.

Gitataw niini nga depende sa sabot ug pag-uyon sa pasahero ang ilang singil.

Kon sa uban gikabalak-an ug gikahadlokan ang Covid-19, aduna sab pipila nga nalipay niini tungod mao na ang ilang gihimong panginabuhian samtang gipatuman sa nasyonal nga gobyerno ang regulasyon apil sa byahe sa mga sakyanan.


Source: Sun.Star Superbalita (https://www.sunstar.com.ph/article/1859258/Superbalita-Davao/Balita/Panginabuhi-panahon-sa-Covid-19?ref=rss&format=simple&link=link)

No comments