Recent Posts

Breaking News

Palit sa lokal nga produkto


Giawhag kagamhanan sa dakbayan sa Mandaue ang mga konsumider nga kon mahimo mga locally made o locally produced nga mga produkto ang pamaliton, aron makatabang nga mobalik og saka ang ekonomiya.

Gisuportahan sa konseho sa Mandaue ang resolusyon nga gipangamahanan ni Konsehal Nerissa Soon-Ruiz ug Konsehal Joel Seno nga nanawagan sa Mandauehanon nga suportahan ang local products.

Matod ni Ruiz nga aron mabuhi og balik ang ekonomiya siya nanawagan sa mga Mandauehanon nga mopalit sa mga lokal nga produkto ilabi na niadtong gipamaligya sa kadalanan.

Siya mipasabot nga kon mahimo nga mamalit ngadto sa mga mamaligyaay sa kadalanan o sa mga gagmayng negosyante inay ngadto sa mga dagkong grocery stores.

Gihangyo usab ni Ruiz ang mga konsumidor nga dili na mohangyo sa presyo sa mga baligya ngadto sa mga gagmayng negosyo.

Natala sab sa maong resolusyon diin gibuhi ang kampanya sa Department of Trade and Industry (DTI) nga “Buy Lokal” aron makabawi ang mga lokal nga negosyo, micro, gagmay ug medium nga negosyo gikan sa pagka-alkansi atol sa enhanced community quarantine.

Gipasabot kini sa resolusyon nga ang “Shop Lokal” o “Buy Lokal” makapalambo sa ekonomiya sa nasud.

Si John Eddu Ibanez, executive secretary ni Mandaue City Mayor Jonas Cortes, nag-ingon nga uyon siya sa resolusyon nga gipasar sa konseho nga ang mga Mandauehanon kinahanglan suportahan ang mga lokal nga produkto.

Atol sa pagpatuman sa enhanced community quarantine (ECQ), ang dakbayan naungot sab ang ekonomiya hinungdan nga gihangyo ang mga konsumidor nga mopalit sa mga lokal nga produkto aron makalihok na ang ekonomiya, sigon ni Ibanez sa pakighinabi sa Superbalita Cebu.

Ang pipila ka mga negosyo sama sa mga motorparts ug kan-anan nagsugod na sa pag-operate sa ilawom sa general community quarantine (GCQ) ug anam na sab nga mibalik ang mga kustomer.

Gipasabot ni Ibanez nga ang pagpalit sa mga lokal nga produkto dili lamang makatabang sa ekonomiya lakip na sa gagmayng negosyante ug mga tindera nga nakasinati ug alkansi tungod sa pagkahunong sa ilang pagpamaligya sulod sa duha ka buwan. / KFD


Source: Sun.Star Superbalita (https://www.sunstar.com.ph/article/1859135/Superbalita-Cebu/Balita/Palit-sa-lokal-nga-produkto?ref=rss&format=simple&link=link)

No comments