Recent Posts

Breaking News

P.5M nga shabu nasakmit


KAPIN sa tunga sa milyon ka pesos nga balor sa shabu ang nasakmit sa hiniusa nga pagpangronda sa mga sakop sa Philippine Drug Enforcement Agency (PDEA) 7 ug Provincial Drug Enforcement Unit (PDEU) sa Cebu Police Provincial Office (CPPO) ingon man ang Minglanilla Police Station.

Si SO3 Art Manzu sa PDEA 7 maoy nangu sa pagpangronda sa Sityo Manggahan sa Barangay Pakigne sakop sa maong lungsod.

Matod ni Manzu, nadakpan ang managsuong Ruel Baynas, 32, ug maguwang niining si Rosebelt Lañojan, 41, nga pulos mga molupyo sa Sityo Manggahan sa Barangay Pakigne.

Samtang, nakasibat ang ginganlan og Niño nga maoy agawon sa dinakpan ug Elmer Respecio, kinsa nakadagan atol sa maong anti-illegal drugs operation.

Dugang ni Manzu nga samdan sa walang bahin sa iyang bukton si Lañojan human kini buot mosuway sa pagbunot sa iyang armas nga .38 revolver apan nabantayan sa usa sa mga operatiba hinungdan nga naunhan.

Ang PDEA 7 gi-monitor ang grupo ni Niño sulod na sa usa ka semana nga miresulta sa pagpahigayon sa buy-bust operation.

Nasakmit atol sa pagpangronda ang shabu nga moabot sa 77 gramos nga dunay kantidad nga tunga sa milyon ka pesos.

Samtang nakuha usab ang usa ka armas nga .38 revolver nga dunay upat ka mga bala gikan kang Lañojan.

Gikonsiderar nga mga high value target ang mga nadakpan apil na ang nakasibat.

Ang awtoridad padayon usa sa ilang hugot nga pagpaniid samtann hugot nga nagpatumann sa kuwarantina sa dakbayan ug lalawigan batok sa pagkaylap sa coronavirus disease 2019 (Covid-19).

Namatikdan ang naninguha usab nga mapalusot ilegal nga drugas ang mga ilegalista. (BBT)


Source: Sun.Star Superbalita (https://www.sunstar.com.ph/article/1861761/Superbalita-Cebu/Balita/P5M-nga-shabu-nasakmit?ref=rss&format=simple&link=link)

No comments