Recent Posts

Breaking News

Ormoc mitala na sa unang Covid-19 case


ORMOC City, Leyte - Natala sa dakbayan sa Ormoc ang labing unang kaso sa Coronavirus Disease 2019 (Covid-19) niadtong Biyernes, Hunyo 5, 2020. Mismo si Mayor Richard Gomez ang nikompirmar niini pinaagi sa Facebook Live pasado alas 6 sa gabii. Ang pasyente usa ka 46 anyos nga lalake, usa ka overseas Filipino worker gikan sa Saudi Arabia ug nagpuyo sa bukirang bahin sa Ormoc.

Matod ni Elsie Jaca sa City Health, niabot ang pasyente niadtong Mayo 27 sakay sa AirAsia Flight Z28570.

Ang maong flight dunay 96 ka pasahero diin tulo niini ang taga Ormoc.

Gikuha sa LGU service vehicle ang tulo ug pag-abot sa border sa Valencia, gi-record ug gidala sa Ormoc City Medical Society alang sa profiling ug pag-rapid test sa wala pa gidala sa Covid Ligtas Isolation Facility sa Dolores. Negatibo ang pasyente sa rapid test.

Pipila ka adlaw ang nakalabay, naigo sa Covid-19 ang pipila ka silingan nga lungsod sa Ormoc sama sa Tanauan, Hilongos, Baybay, Tolosa, Jaro, Abuyog, Burauen ug uban pa.

Niadtong Hunyo 3, gipahigayon ang pagkuha og swab sample sa pasyente ug nigawas ang resulta pagka Biyernes diin positibo kini sa Covid-19. Matod ni Jaca, didto sa Manila gi-test na ang pasyente apan negatibo sa Covid-19, busa dako ang pagtuo sa city health nga natakdan kini atol sa biyahe.

Dugang ni Jaca nga ma-extend pa og 21 ngadto sa 25 ka adlaw ang pag-isolate sa pasyente samtang ang nakauban niini sa unit sa Dolores ang gilahi na usab og unit.

Sa iyang bahin, si Mayor Gomez nipadayag sa iyang kasubo sa maong resulta. Subli nga gibalikan sa mayor ang way saktong koordinasyon ug impormasyon gikan sa nagpasiugda ning programa ngadto sa mga receiving LGU.

“I’ve always said na as much as possible, kung pwede, coordinate with us, properly, always. ‘Yung lang naman ang hinihingi namin sa inyo, coordinate properly,” matod niya.

“Yes, we are prepared, we are ready. But I’m not happy with what happened. It could have been prevented if strict health protocols were followed. But, again, nandyan na ‘yan so we’ll have to deal with it,” dugang sa Mayor.

Gisugilon usab ni Jaca nga gamay ra hinuon ang tawo nga dunay close contact sa pasyente ug mao lang kadtong drayber sa van sa LGU, staff sa resident recovery ug dunay medtech.

Matod ni Jaca, wala hinuon angay kabalak-an kay pulos naka Personal Protective Equipment (PPE) ang naka-close contact.

Pipila ka adlaw gikan sa paggawas sa resulta, duna na usab himuon nga pagkuha og swab sample sa pasyente kung positibo pa ba kini o negatibo na sa Covid-19. / JKDP


Source: Sun.Star Superbalita (https://www.sunstar.com.ph/article/1859283/Superbalita-Cebu/Balita/Ormoc-mitala-na-sa-unang-Covid-19-case?ref=rss&format=simple&link=link)

No comments