Recent Posts

Breaking News

Opao Police Station gi-lockdown


Gi-lockdown ang Opao Police Station sa Mandaue City Police Office (MCPO) human dunay usa ka dinakpan nga positibo sa coronavirus disease (Covid-19) niadtong Huwebes, Hunyo 11.

Adunay upat ka mga pulis nga na-lockdown sa estasyon samtang, 11 ka mga pulis ang gipaubos sa home isolation.

Sigon ni PMaj. Mercy Villaro, ang tigpamaba sa MCPO, nga aduna silay nadawat nga resulta sa RT-PCR swab test Ug sa tulo ka mga resulta sa mga dinakpan usa niini nagpositibo sa Covid-19

Ang dinakpan nasikop sa kapulisan miaging semana tungod sa kalambigitan sa ilegal nga drugas.

Matod ni Villaro, ang dinakpan mamahimo rang makapyansa sa iyang kaso nga giatubang ug protocol sa kapulisan nga kung adunay makagawas na ipaubos sa swab test.

Tungod sa maong resulta gipaubos dayon sa lockdown ang Opao Police Station pasabot niini wala nay makasulod ug makagawas sa maong estasyon.

Lakip sa na-lockdown sa ilang estasyon ang hepe nga si PMaj. Aldrin Villacampa, kauban ang ubang mga sakop sa kapulisan ug duha ka mga dinakpan.

Ang mga kapulisan nga miadto sa ilang estasyon sa milabayng duha ka semana ug wala sa maong estasyon panahon sa lockdown, gipaubos sa home isolation.

Sigon ni Villaro nga ang mga kawani sa maong estasyon ug ang duha ka laing dinakpan ipaubos sa swab test.

Kadtong mga nag-home isolation muabag ang mga Barangay Health Emergency Response Team (Bhert) sa pagpaubos niini sa swab test.

Ang mga kawani nga na-lockdown hatdan lang og pagkaon, sigon ni Villaro.

Walay angay ikabalaka ang mga lugar nga sakop sa maong estasyon kung adunay mga kakulian o kagubot sa ilang lugar tungod ang ubang mga estasyon sa kapulisan muabag aron magpadayon gihapon ang kalinaw sa dakbayan, sigon ni Villaro.

Dili na modawat og mga walk-in nga mga reklamo ang Opao Police station tungod sa maong panghitabo.

Gibutang sa usa eskwelahan sa dakbayan ang dinakpan nga nagpositibo apan aduna gihapon kini pulis nga nagbantay niini. / KFD


Source: Sun.Star Superbalita (https://www.sunstar.com.ph/article/1859919/Superbalita-Cebu/Balita/Opao-Police-Station-gi-lockdown?ref=rss&format=simple&link=link)

No comments