Recent Posts

Breaking News

‘No Watcher and Visitors Policy’ -- VSMMC


GIPAHIBAW sa Vicente Sotto Memorial Medical Center (VSMMC) nga gipatuman niini ang “No Watcher and Visitors Policy” sugod kagahapon Martes, Hunyo 9, 2020.

Natala sa maong pahibawo, pinaagi sa ilang Facebook page niadtong Hunyo 8, nga lakip kini sa ilang infection prevention control measures aron sa pagsiguro sa kaluwasan sa mga pasyente, ilang pamilya, lakip na ang health care workers.

“Should there be any urgent need, our staff shall call for watchers of patients through phone,” pahibawo sa tagdumala sa VSMMC ngadto sa SunStar Cebu.

Apan way labot ang mga watchers sa pediatric patients nga gikinahanglan alang sa patient care, pagpirma og mga dokumento, education and instruction, ug counseling.

Dili usab maapektahan niini ang watchers sa mga renal patients kay mamahimo man sila nga moduaw sa pasyente sulod lang sa upat ka oras.

Sa laing bahin, si Dr. Gerardo Aquino, Jr., VSMMC Chief, mihulagway nga dili makiangayon nga ipasangil ngadto sa mga medical staff sa VSMMC ang pagsaka sa kaso nagpositibo sa Barangay Sambag Dos, dakbayan sa Sugbo.

Kini sa dihang mipadayag sa iyang kabalaka si Sambag Dos Barangay Kapitan Ryan Aznar, sa presensya sa mga VSMMC frontliners nga gikatahong nag-abang og kwarto sa ilang barangay.

Aduna nay natala nga 70 ka mga nagpositibo sa Covid-19.

Matod ni Aznar nga sa ilang pagsubay anaa sa 20 ka VSMMC frontliners nga nagpositibo sa ilang barangay.

Dugang niya, aduna sa ilang mga residente nga nagpositibo human nga nakaduaw sa VSMMC outpatient department aron mo-konsulta o aron manganak.

Apan, alang ni Aquino, unfair nga ipasangil lang sa VSMMC ang maong transmissions.

“Dili fair to say, sala namo nga naka-infect (It’s not fair to say that it’s our fault there are infections). It’s already confirmed there are already local transmission,” matod sa niya.

Giklaro niya nga gi-require sa ilang obstetricians ang Covid-19 test alang sa mga mabdos nga moadto sa ilang tambalanan aron manganak human sila ma-admit.

Dugang sab niya nga dili tanang na-infected sa SARS-Cov-2 nagpakita og sintomas ilabi na nga adunay pagtuon nga nagpakita nga makatakod sab sa maong sakit ang mga positibo apan asymptomatic kon walay gibati.

Matod niya nga gi-house sa mga dorm ang ilang mga personnel nga direktang nag-atiman sa mga Covid-19 positive ug tugotan lang sila makauli sa ilang mga balay kada duha ka semana.

“It turned out nga ang na-positive kadtong wala maghandle og Covid positive (It turned out that those who were not handling Covid-19 patients were the ones who tested positive),” matod niya.

Sigun ni Floro Casas, Cebu City administrator, nga miuyon si Mayor Edgardo Labella nga motagana og dorm alang sa mga VSMMC frontliners subay sa request ni Aznar.

Matod ni Casas nga ilang gitan-aw karon ang hotels nga posibleng makahatag og 25 ka mga higdaanan sa VSMMC frontliners. (WBS with PR)


Source: Sun.Star Superbalita (https://www.sunstar.com.ph/article/1859557/Superbalita-Cebu/Balita/No-Watcher-and-Visitors-Policy-VSMMC?ref=rss&format=simple&link=link)

No comments