Recent Posts

Breaking News

N. Bacalso sirhan sa tungang gabii; CSCR maoy maagian padung south


SUGOD karong Biyernes, Hunyo 26 sa alas 12:01 sa kaadlawon, ang Cebu South Coastal Road (CSCR) na lang ang magpabilin nga abli isip agianan sa mga motorista nga buot mosulod sa habagatan nga bahin sa Sugbo ug mosulod sa Dakbayan sa Sugbo.

Siradoan na usab pagbalik ang Natalio Bacalso Avenue sa Barangay Bulacao nga nag-utlan sa Cebu City ug Talisay.

Kini subay sa pagsira sa borders ug pagpatuman na pagbalik sa mga checkpoint.

Atol sa tigom sa kadagkoan gikan sa Dakbayan sa Talisay, lungsod sa Minglanilla, Dakbayan sa Mandaue, lungsod sa Consolacion ug kapulisan sa Hunyo 24, gipahibaw ni Police Colonel Roderick Mariano nga mahimo na nga ibalik ang mga barangay control point alang sa seguridad ug kaluwasan sa mga residente.

Ipatuman na usab ang 24 oras nga checkpoints sa mga ruta gikan sa Dakbayan sa Sugbo paingon na sa lungsod sa Compostela, Dakbayan sa Mandaue sa amihanan, Balamban sa kasadpan ingon man sa Cordova sa isla sa Mactan.

Gipahibawo sa tigom nga ipakatap lukop probinsya sa Sugbo ang 1,657 ka mga uniformed personnel gikan sa Cebu Provincial Police Office (CPPO), Bureau of Fire Protection, Philippine Coast Guard, Armed Forces of the Philippines ug uban pa nga force multipliers nga maoy mag man sa checkpoints ug mohan-ay sa border controls.

Aron masiguro nga hapsay ang pagpatuman sa kamandoan, mosusi si Cebu Governor Gwendolyn Garcia sa mga checkpoint ug borders sa lalawigan.

Ang pagpasira pag-usab sa mga agianan gibuhat aron mapugngan ang pagkatap sa kagaw sa coronavirus disease sa probinsya.

Atol sa tigum kauban sila si Secretary Roy Cimatu, si Garcia nagkanayon nga human gipaubos sa general community quarantine ang Probinsya, moabot sa 23 na ka adlaw nga gibuksan niini ang mga ganghaan aron nga mas hamugaway nga makalusot ang mga dunay tuyo sa syudad sa Sugbo, nisaka usab og tulo ka pilo ang mga kaso sa Covid-19 sa Lalawigan.

“And so we need to stop this. And as we do this, with much confidence I know that the increase of cases in Cebu City will be arrested. We have two very capable generals with us, helping us,” matod ni Garcia sa Hunyo 25.

Ang iyang gipasabot mao sila si Cimatu ug retired Major General Melquiades Feliciano, deputy chief implementer sa Visayas sa Inter Agency Task Force (IATF) ug usa sa mga opisyal sa Cebu Task Force on Covid-19.

Sa datos sa Probinsya sa Hunyo 24, nakatala na kini og 749 ka mga positibo nga kaso gikan sa Marso hangtod sa Hunyo, 492 niini gikonsiderar nga active cases.

Hinuon may 186 na ka mga indibidwal ang naka-recover apan may 71 na usab ang nangamatay. (ANV)


Source: Sun.Star Superbalita (https://www.sunstar.com.ph/article/1861360/Superbalita-Cebu/Balita/N-Bacalso-sirhan-sa-tungang-gabii-CSCR-maoy-maagian-padung-south?ref=rss&format=simple&link=link)

No comments