Recent Posts

Breaking News

Misis mipatay sa bana, anak, 3 ka apo samdan


PATAY ang bana ug anak samtang angol ang tulo ka mga apo human gipangtigbas sa Sitio Magpait, Barangay Cabalantian, lungsod sa Manticao, Misamis Oriental, alas 6:00 sa buntag niadtong Biyernes, Mayo 29.

Ang asawa ug apohan sa mga bata nga si Vivina Loresca, 70, maoy suspek ug anaa sa kustodiya sa kapulisan sa Manticao.

Sumala sa kapulisan, giingong nitukar pagbalik ang sakit sa pangisip gumikan sa pagkamatay sa iyang anak tungod sa balatian ug nahimo ang nahisgutang ngilngig nga krimen.

Wala nay kinabuhi nga naabtan sa mga awtoridad ang mga biktima nga si Luciano Loresca, 70, ug ang anak nga si Elvie, 40, kinsa giingong gigulgol ang mga liog ug grabe nga samad nga nahiagoman sa tiyan nga bahin.

Samtang, samaran usab ang mga apo nga 13, 10 ug 8 anyos kinsa pulos mga babaye nga gisulayan usab sa pagtigbas apan giingong nakadagan palayo ug anaa sa luwas nga kahimtang.

Sa impormasiyon nga nahipos gibutyag sa kapulisan nga nangatulog ang mga biktima gumikan na usab kay hago kini sa dihang nag-vigil sa kamatayon sa ila ra usab nga miyembro sa pamilya.

Samtang tulog ang mga biktima kalit lang matod kining gipanigbas ug swerteng nakamata ang usa sa mga bata ug gipamukaw ang iyang mga igsuon.

Gidugang pa nga wala matod niangkon ang suspek sa iyang nahimo apan ang mga bata mismo ang nakasaksi sa panghitabo ug gitumbok ang apohan.

Nakuha ang giingong mahait nga hinagiban nga gigamit sa maong pagpanigbas.

Ang suspek anaa na sa bilanggoan ug posibleng mag-atubang sa kaso nga parricide.

“Related ra gyud sila by blood so parricide gyud ang mabutang nato ni nga kaso,” matod ni Police Lieutenant Chance Ramirez, hepe sa Manticao Municipal Police Station. (GPL)


Source: Sun.Star Superbalita (https://www.sunstar.com.ph/article/1858563/Superbalita-Cebu/Balita/Misis-mipatay-sa-bana-anak-3-ka-apo-samdan?ref=rss&format=simple&link=link)

No comments