Recent Posts

Breaking News

Mipatay sa opisyal sa Kadamay mitahan, miangkon


Ormoc City, Leyte - Mitahan sa kapulisan ang suspek sa pagpatay sa giingong national secretary general sa kahugpongan nga Kadamay.

Miyerkules, Hunyo 3, ang suspek nga si Enero Duran, 28, nagpuyo sa Barangay Guintigian, Ormoc City ang personal nga miadto sa barangay aron pagtahan.

Giangkon ni Duran atubangan sa media ug barangay opisyal nga siya ang mipatay ni Carlito Badion, 52, giingong national secretary sa Kadamay.

Matod ni Duran nga sa wala pa ang hitabo ang cellphone ni Badion gikuha sa iyang bayaw nga si alyas “Jordan,” usa ka menor de edad.

Iyang gitambagan si Jordan nga ipauli ang cellphone kay total maka cellphone ra man sila kung magkugi lang.

Giuli nila ang cellphone ni Badion ug pila ka adlaw ang nakalabay nahitabo ang krimen. Matod ni Duran, nianang gabii sa Mayo 27 padung sila mangita og pakra sa dihang gitawag sila ni Badion nga naglingkod sa usa ka payag.

Niduol sila og kalit nga gidapog ni Badion si Jordan. Matod ni Duran, nasakitan siya sa gibuhat ngadto sa iyang bayaw hinungdan nga iyang gibunalan sa iyang gigunitan nga kahoy og kaupat si Badion.

Si Duran kauban sa duha ka menor de edad pipila ka metros gikan sa payag ug gitabok pa nila sa sapa aron makakita og humok nga yuta nga ilang kalubngan ug ilang gikotkot gamit ang bagol.

Wa mahimutang si Duran sa iyang nabuhat hinungdan nga niadto kini sa barangay ug nakig-atubang sa media aron ikompisal ang iyang gibuhat nga krimen.

“Oo, angkon ko nga ako gyod nagbuhat,” matod ni Duran.

Sa iyang bahin, si Ormoc City Police Office Director PCol. Armel Gongona nalipay sa pag-surrender ni Duran kay dako kini nga pruweba batok sa mga akusasyon sa mga tigpaluyo sa Kadamay nga kapulisan ug militar ang mipatay sa ilang miyembro.

Pasakaan og kaso nga murder si Duran sa piskaliya sa Ormoc.

Gipaabot sa kapulisan ang kabanay aron hangyuon nga ipa-autopsy ang lawas ni Badion. / JKDP


Source: Sun.Star Superbalita (https://www.sunstar.com.ph/article/1858980/Superbalita-Cebu/Balita/Mipatay-sa-opisyal-sa-Kadamay-mitahan-miangkon?ref=rss&format=simple&link=link)

No comments