Recent Posts

Breaking News

Mipasiugda sa 'Lacion og motorcross, ikiha


PASAKAAN og kaso sa lungsod sa Consolacion ang giingong organizer sa nahitabong motocross event sa Hunyo 28.

Ang organizer nga ginganlang Richard Latos maoy gitumbok sa lungsod nga nangulo sa maong kalihukan bisan paman og gidili ang pagtigum o bisan unsa nga kalihukan ubos sa lagda sa Inter Agency Task Force (IATF) Covid-19, ug ubos sa kamandoan sa lalawigan sa Sugbo nga Executive Order No. 17.

Bisan paman og gipaubos na sa general community quarantine ang lalawigan gidili gihapon ang bisan unsa nga kalihukan tungod sa hulga sa coronavirus disease (Covid-19).

Base sa report sa kapulisan moabot 15 ka mga partisipante sa motocross ang ilang giharang ug gipapauli.

Ang kalihukan gikatakda unta nga ipahigayon sa ala 1:00 sa hapon apan alas 11 pa lang nasigpatan na kini sa kapulisan hinungdan nga wa usab kini madayon.

Wala na gidakop pa sa kapulisan ang mga partisipante tungod mituman kini dayon, apan gikuha na niini ang mga pangalan ug detalye.

Ang lungsod sa Consolacion mipahibaw na nga wala mananghid o wala usay permiso ang maong kalihukan.

Ubos sa Provincial Ordinance ng nag adapt sa EO 17-H mahimong pasakaan og kaso o magmulta ug moabot 5 mil pesos ang makalapas.

Ang organizer giisip nga persona non grata sa lungsod, pasabot gi ban na ang maong tawo sa pagsulod sa lungsod.


Source: Sun.Star Superbalita (https://www.sunstar.com.ph/article/1861884/Superbalita-Cebu/Balita/Mipasiugda-sa-Lacion-og-motorcross-ikiha?ref=rss&format=simple&link=link)

No comments