Recent Posts

Breaking News

Mibalhin sa piggery


TUNGOD sa Pantawid Pamilyang Pilipino Program (4Ps), daghang kausaban sa kinabuhi sa mga kabus nga Filipino sa pagpangita og diskarte aron paghaw-as gikan kalisdanan.

Usa na niini si Dimna Terol ug ang iyang pamilya nga benepisaryo sa 4Ps sa San Remigio, Sugbo.

Nadasig sa suportang salapi sa pamilya matag buwan sa pagsuporta sa panginahanglan sa pamilya.

Si Dimna ug ang iyang bana nga si Melvin nagsugod niadtong sayong bahin sa 2000s dihang parehong nagtrabaho sa paghimo og basket nga dunay daghang desinyo gamit ang lokal nga materyal.

Usa kini sa komon nga pangita sa komunidad sa dapit nga lokal nga produkto nga ipangbaligya sa gawas sa nasod.

Matod ni Dimna, samtang nagtrabaho sa basket, siya ug ang iyang bana mokita matag semana og usa ka libo ka pesos nga dili igo sa tibuok panginahanglanon sa pamilya labin sa pagpatungha sa mga anak.

Ang magtiayon dunay tulo ka mga anak nga sila si Charity Mae, Jemson, ug Melvin Jr.

“Sauna lisod gyud kaayo mi, maglibog mi unsaon paggamit ug pag-budget sa amoang kwarta aron dili makulang,” matod ni Dimna.

“Mao nagpasalamat gyud ko nga naapil ko aning 4Ps kay dako kaayo siya og natabang sa among pamilya, nakatabang gyud siya sa among kalisod,” dugang niya.

Si Dimna nalipay nga nahimong benepisaryo sa programa human nasuta sa pakisusi sa staff sa DSWD sa miaging napulo na ka tuig.

“Tungod sa 4Ps, nakapaeskwela gyud mi sa among mga anak gani naa nami anak nga ni-graduate pag 2017 og pagkamaestra,” matod ni Dimna.

Ang iyang kamaguwangang anak nga babaye nakakuha og scholarship sa college gikan sa Expanded Students Grants in Aid Program for Poverty Alleviation (ESGP-PA).

Samtang, ang iyang ikaduhang anak usa ka second year college nga nikuha sa kursong Graphics and Design ug ang kamanghoran naa sa grade 10.

Tungod sa 4Ps, si Dimna nakadaginot sa maong kwarta ug nagsugod sa pagpamuhi og baboy hangtod nidako na kini.

“Ang pagka-4Ps namo nakatabang-tabang gyud aron kami makatigum og makasugod ug laing panginabuhian,” matod ni Dimna.

Mao kini nag-aghat sa magtiayon sa pagtutok sa pagpamuhi og baboy tungod sa maayong litas niini.

Sa pagkakaron, si Dimna ug iyang pamilya nagdepende sa kita sa pamilya sa ilang baboyan ug pagpamuhi og manok nga bisaya samtang ang bana nagpadayon sa pagtrabaho isip construction worker.

“Dapat tarungon gyud nato og gasto ang kwarta ug gasa gikan sa gobyerno sa maayo na butang,” pasabot ni Dimna kon nganong nabalhin siya sa negosyo sa baboy tungod sa pagdaginot sa hinabang gikan sa kagamhanan. (PR)


Source: Sun.Star Superbalita (https://www.sunstar.com.ph/article/1859292/Superbalita-Cebu/Balita/Mibalhin-sa-piggery?ref=rss&format=simple&link=link)

No comments