Recent Posts

Breaking News

Mga trabahante, drivers, operators mingtiyabaw


HANGYUON sa Kagamhanan sa Dakbayan sa Lapu-Lapu ang Inter-Agency Task Force (IATF) nga maka-operate na pagbalik ang PUJs sa dakbayan aron nga maka-augment sa kakuwang sa buses sa paghakot og mga pasahero.

Gipahibawo ni Mayor Junard Chan nga dili paigo ang buses nga nagdagan human gipaubos na sa general community quarantine ang siyudad, ilabi na nga limitado ra ang gidaghanon sa pasahero nga makasakay.

Ang problema sa dakbayan sa Lapu-Lapu mao usab ang nasinati sa ubang mga dapit sa Sugbo nga gipaubos sa general community quarantine.

Naa na tuoy mga rota ang Land Transportation Franchising and Regulatory Board (lLTFRB) 7, gamay pa ang nanagang publikong sakyanan.

Namatikdan nga niadtong Hunyo 1 diin pipila sa mga locator sa Mactan Export Zone (MEZ) nibalik na sa ilang operasyon, apan bul-og sa mga pasahero nga trabahante nagtapok ug way kasakyan sa ilang pagpa-uli.

Samtang nga nipaabot sa ilang yango-ngo ang mga PUJ operator ug drayber ngadto ni Chan nga bisan nga gipa-ubos nga sa GCQ, di sila makalabang sa duha ka mga taytayan paingon sa silingang dakbayan.

“Since there is still an IATF guideline that they can’t cross, gibawalan pa sila. Mao na nga nitiyabaw sila (PUJs operator/drayber),” matod sa mayor.

Paningkamutan ni Chan nga mapangitaan og paagi nga makabalik na sa ilang panginabuhian ang mga PUJ drayber/operator, sa mga rota sud sa Lapu-Lapu.

“Tan-awon nato kon pananglitan, makita nato nga sa atong gipadagan nga buses is not sufficient to cross Mandaue and Cebu, we will make an appeal to the IATF,” dason sa opisyal.

Sa susamang kalambuan, ipatawag sa mayor ang atensiyon niadtong mga locator sa MEZ nga wa mo-provide og kasakyan sa ilang mga trabahante nga naghatag og risgo sa pagkatap sa virus ilabi na nga nagtapok sa usa ka dapit kay nagpaabot og kasakyan. (FVQ)


Source: Sun.Star Superbalita (https://www.sunstar.com.ph/article/1858866/Superbalita-Cebu/Balita/Mga-trabahante-drivers-operators-mingtiyabaw?ref=rss&format=simple&link=link)

No comments