Recent Posts

Breaking News

Mga kapitan mitiyabaw sa quarantine pass


PIPILA ka mga barangay kapitan nangtiyabaw kay katunga, uban wa katunga, sa gidaghanon sa mga QR code pass ang nangabot itandi sa actual nga gidaghanon sa mga panimalay sa ilang barangay.

Ang Barangay Guadalupe, labing dako sa Siyudad sa Sugbo, dunay 20,000 ka mga panimalay. Apan matod ni Barangay Kapitan Michael Gacasan nga mokabat lang og 13,000 ka QR code pass ang gigahin alang kanila. Iya lang pasabton ang iyang mga katagi barangay nga di tanan makadawat.

Si Punta Princesa Barangay Captain Eleno Andales Jr. nidumili sa pagdawat sa mga quarantine pass nga gihatod.

Sa iyang Facebook post, siya niingon nga 620 ka passes ang gipadala sa iyang barangay nga unta duna may 4,500 sa Punta Princesa.

Si Labangon Barangay Captain Victor Buendia niingon nga mohatag siya og 2,632 ka mga pass alang sa 10,000 ka mga panimalay sa barangay.

Naglaum siya nga ang mga sakop sa Mayor’s Information and Liaison Office (Milo) mohatag og laing quarantine pass.

“Ako concern basin ang Milo manghatag pud og ilaha, as what happened last quarantine passes (distribution). My youth religiously distributed (it) house to house, one pass per household. We stopped it after they encountered Milo group who are also giving passes,” nagkanayon si Buendia.

Si Association of Barangay Councils (ABC) President ug Kasambagan Barangay Captain Franklyn Ong niingon nga gamay lang nga passes ang gigahin sa iyang barangay, apan iya lang manihuon kay ang tumong mao ang pagpatumang estrikto sa stay-at-home order.

Kay duna may daghang subdivisions sa iyang barangay, si Ong makig-coordinate tali sa mga opisyal sa homeowners association aron i-arrange ang panagsabot kalabot sa passes.

Gibana-bana ni Ong nga duna siyay 6,000 ka mga panimalay.

Alang kang Cogon Pardo Barangay Captain Harry Eran, siya nagpaabot nga dugangan og 2,300 ang passes kay nakadawat siya og 3,000. Duna siyay 5,300 ka mga panimalay. (JJL)


Source: Sun.Star Superbalita (https://www.sunstar.com.ph/article/1861666/Superbalita-Cebu/Balita/Mga-kapitan-mitiyabaw-sa-quarantine-pass?ref=rss&format=simple&link=link)

No comments