Recent Posts

Breaking News

Medical mission sa San Fernando


ANG mga nanagpuyo sa duha ka bukirang barangay sa lungsod sa San Fernando, Sugbo nakabenepisyo sa medikal nga pag-atiman, igo lang nga wala pa mabutang ang Sugbo ubos sa kwarentina aron mapugngan ang pagkuyanap sa coronavirus disease 2019 (Covid-19).

Ang Solid Earth Development Corp. (SEDC) nakaalagad sa 1,187 ka mga pasyente sa managlahing misyon nga gipadala niini sa Ilaya sa amihanang utlanan sa lungsod sa San Fernando ug Naga City sa Pebrero 15 ug sa Tinubdan sa miaging Marso 14.

Lakip niini ang 432 ka mga hamtung nga may mga gipamati sa ilang lawas ug 507 ka mga bata, dugang pang 32 nga may mga isyu sa ngipon ug laing 120 nga nakakuha og antipara nga karon makabasa na, mibutyag si Mitzie Almira I. Carin, tagduma sa SEDC human resources and administration (HRA) division.

Nag-abot ang didto Ilaya sa hawan nga luna tupad barangay hall, samtang ang mga taga-Tinubdan nangadto sa Ciriaco V. Paradela (Tinubdan) Elementary School nga mitamod na sa social distancing niadtong tungura kay bag-o lang napamahayag sa World Health Organization nga na pandemya na ang Covid-19.

Matod ni Florida Paca, 81, taga-Purok Mangga, ika-2 nang higayon nga nakapahimus siya sa medical mission nga napadala sa SEDC sa Ilaya maka-4 na nga higayon uban sa primerang kilyente niini, ang Taiheiyo Cement Philippines, Inc. (TCPI).

Unang mipadala ang duha ka mga kaalyadong kompanya pagka-Hulyo 2010 nga miatiman sa 390 ka mga residente, dayong pagka-Pebrero 2014 mga mialagad sa 503 ka lumolupyo, ug usab sa Hulyo 2017 nga mi-alima sa 737 ka mga pasyente.

MIPAAMBIT

“Daghan kog gipamati sa akong lawas, sakit akong kabukugan, labad sa ulo ug kanunay dili ko ganahan mokaon. Wala pa jud ko naka pa check-up kay wa koy ikabayad,” mipaambit Paca.

Niining misyon, siya mibutyag nga giingnan siya sa doktor nga aduna siya’y cataract, ug nga kinahanglan kining operahan sa ospital, apan wala siya’y magasto alang niini ug igo na lang niya nga makapahupay sa uban niyang gipamati.

“Gitagaan ra ko’g tambal sa katolkatol, lain para sa sakit sa kabukugan ug mga bitamina. Dako jud kaayu ni’g ikatabang nako,” matod niya.

Sa Tinubdan, gidala ni Monina Alicaway, 49, sa Purok Gumamela, ang iyang upat ka mga apo nga may hilanat ug ubo, ug gikahimuot niya nga naatiman ra sila kay layo ra ang ilang barangay sa pinakaduol nga klinika o ospital.

“Init kaayo ang panahon, dali masakit ang mga bata ug, ilabi na pud nga naay virus karon, maayo ni’ng nahatagan og vitamin C ang mga tao para mas lig-on ang resistensya ug dili dali masakit,” matod ni Alicaway.

Ika-5 na kadto ka higayon sukad napadal-an og misyon ang Tinubdan, una sa Nobiyembre 2007 nga miatiman sa 580 ka lumolupyo, dayon sa Oktubre 2012 nga mialagad og 826, sa Septiyembre 2015 nga mitagad sa 658, ug kapatusan sa Septiyembre 2018 nga mialima sa 713 ka pasyente.

NANGUNAY

Nangunay sa pag-asikaso si SEDC director Hiroyuki Sakakibara sa misyon sa Ilaya uban sa iyang katugbang nga senior technical adviser nga si Masatsune Takeyasu.

Miabag sab si Chiyuki Sugawara, tagduma sa planta sa TCPI ug senior vice president for operations, uban sa iyang luyoluyo alang sa engineering nga si Kimitoshi Yoshida.

Didto sab si Takuya Nose, luyo-luyong pangulo sa TCPI alang sa administrasyon, nga miabag sab didto sa Tinubdan diin unang nakapangunay ang mipuli kang Sakakibara isip SEDC director, si Motohiro Tonsho.

Tibuok pwersa sa Ilaya diha sab, pinanguluhan ni kapitan Cecilia S. CaƱalita, inabagan nilang konsehal Marcelino M. Pegarido, Marlou O. Sasam ug Jhoan S. Brady, ug ingon man si konsehal Lolita Pinatil didto sa Tinubdan.

Mitabang sab didto sa Tinubdan ang mga sakop sa Triple 8 Resources Development Corp. pinangulohan ni Manuelo Moratin, ilang safety manager, sa mga kawani sa SEDC ug TCPI nga mi-alayon sa duruha ka mga misyon.

Ang nag-sunod-sunod nga mga medical mission nga napadala sa SEDC uban sa TCPI sukad 2005 hangtod karon nakapangalagad na sa 33,909 ka pasyente. Lakip nila ang naatimang 600 ka pasyente sa Magsico ni’ng bag-o pa lang, 449 sa Bugho, ug 547 sa North Poblacion. (PR)


Source: Sun.Star Superbalita (https://www.sunstar.com.ph/article/1858556/Superbalita-Cebu/Balita/Medical-mission-sa-San-Fernando?ref=rss&format=simple&link=link)

No comments