Recent Posts

Breaking News

Market admin: di tinuod mga isda giyabo


MIKATAP sa Facebook ang usa ka post sa gihimong clearing operation sa mga sakop Ormoc City Market Enforcers.

Ang maong post ni Roa Kath Leen niani og liboan nga shares nga nagkanayon, naluoy siya sa tiguwang nga namunit sa baligya nga isda.

Matod sa nag-post, pwede ra unta pamultahon dili lang ipanghuwad kay ang puhonan gihagoan ug gisingtan.

Nahinabi sa Superbalita Cebu si Ruel Cañete, market administrator, siya nidepensa nga walay nahitabong paghuwad sa mga tinda nga isda.

Matod ni Cañete, sa una pa nahitabo ang operasyon, ila na gipamadlong ang mga manindahay sa gawas.

“Kada adlaw man jud na namo buhaton nga badlungon sila unya magbalik balik gihapon” matod ni Cañete.

Naay uban nga wala maminaw sa pagbadlong sa mga enforcers hinungdan nga gikompiska ilang mga tinda subay sa silot nga nalatid sa Market Code.

Makita sa usa video nga gipamunit sa mga enforcers ang nangayabo mga isda aron ibalik sa plangana.

Usa ka lab-asero ang miapil sa eksina ug gisuwayan og ilog ang plangana hinungdan sa inilugay ug nayabo pagbalik ang isda.

Si Cañete nipasabot nga duna sab diay silay oras nga gihatag sa mga lab-asera nga mo gawas, gikan alas 4 sa kadlawon hantud alas 8 sa buntag.

“Pag alas 8 sa buntag hantud alas 4 sa hapon, clearing operation gyod na namo. Lisud man mag permanente sila kay ang uban anha ra iyabo sa karsada ang dugo ug hinugas sa isda” matod ni Cañete

Daghan usab nga mga nag-abang og pasong sud sa fish section ang nireklamo kay ang mga customer harangon na sa mga naninda sa gawas.

Gawas sa pagkompiska, mamahimo usab nga makamulta ang mo supak sa market code.

“Wala lang gyod makita ang tibuok hitabo. Wa gyod mi mangyabo og tinda. Ang nahitabo naa lang inilogay hangud mangayabo” matod ni Cañete.

Pipila ka oras ang nakalabay, nangayo og despensa ang nag-post sa Facebook ug gi-upload ang video sa nahitabo. (JKDP)


Source: Sun.Star Superbalita (https://www.sunstar.com.ph/article/1861293/Superbalita-Cebu/Balita/Market-admin-di-tinuod-mga-isda-giyabo?ref=rss&format=simple&link=link)

No comments