Recent Posts

Breaking News

Mandaue namutang og bike lanes


ANG Mandaue City nagsugod na pagbutang og bike lanes sa kadalanan sa dakbayan sugod sa gabii sa Lunes, Hunyo 8, 2020.

Di na angay mabalaka ang bikers kon asa sila moagi tungod kay aduna nay ipangbutang nga bike lanes sa tibuok syudad.

Si John Eddu Ibanez, executive secretary ni Mandaue City Mayor Jonas Cortes, niingon nga ang dakbayan nagsugod na sa pagkuha sa pintura nga gikinahanglan sa pagmarka sa mga linya sa bike lanes.

Gipahibawo usab niya nga nimando si Cortes nga di na kinahanglan nga iparehistro pa ang mga biseklita.

Ang City Planning Office gitun-an ang mga dalan nga angay butangan og bike lanes.

Dunay duha ka matang sa bike lanes ang ibutang, nagdepende sa gidak-on sa dalan.

Usa ini mao ang sharrow, diin ang ubang mga sakyanan gitugotan sa pag-agi.

Nakahimo na og mapa ang dakbayan sa mga dalan nga butangan og bike lanes.

Kini ang A.S. Fortuna St., A.C. Cortes Ave., P. Burgos St., Gomez St., A. del Rosario St., A. Logarta St., E.O Perez St., Zuellig St., Ouano Ave., Mantawi Drive ug S.B. Cabahug St.

Gisugdan na sa pagbutang og bike lanes sa A. del Rosario St.

Adunay bike lanes nga adunay oras kon kanus-a lang makaagi ang bikes.

Makaagi lang sila gikan sa alas 6 sa buntag hangtod sa alas 8 sa buntag ug alas 5 sa hapon hangtod sa alas 8 sa gabii.

Kining mao nga mga dan gilangkuban sa H. Abellana St., M.C. Briones St., M.L. Quezon St. ug H. Cortes St.

Gipasabot sab ni Ibanez nga sagad sa mga sharrow bike lanes kadtong mga gagmay nga dalan sama sa L. Jayme St., V. Albano St., V.Veha St., D.S Suico St., P. Remedio St. P. Basubas St. ug uban pang mga interior nga dalan.

Sa ubang mga dan, ekslusibo nga makaagi ang mga bike, way tawo o four-wheeled motorized nga mga sakyanan.

POLISIYA

Sa laing bahin, sa Facebook post ni Jammal Calipayan, Mandaue City administrator ug acting head sa Traffic Enforcement Agency of Mandaue (Team), siya niingon nga adunay ipatuman nga mga sumbanan alang sa mga cyclist.

Ang tanang cyclist kinahanglan nga mogamit og helmets samtang nagbisikleta.

Kon mobiyahe inig gabii, kinahanglan nga mugamit og reflectors sa atubangan ug luyo o blinkers.

Kinahanglan di mag-overloading ang biseklita ug kinahanglan nga mosunod ang bikers sa balaod sa trapiko.

Kinahanglan anaa lang sila sa usa ka lane ug di mo-counterflow sa dagan sa trapiko.

Kinahanglan nga bansayon sa bikers ang hand signals kon gusto silang mohunong o moliko.

Sigon sab sa post nga hatagan og usa ka semana ang bikers nga hinumdoman ang guidelines una ipatuman sa Dakbayan.

NAG-PARK

Sa unang adlaw sa pagbutang sa bike lanes, adunay mga sakyanan nga nag-park sa lanes hinungdan nga ang ubang bikers mulihay.

Sa Facebook Live ni Ibanez, gipahinumdoman niya ang mga tag-iya sa sakyanan nga di i-park sa bike lanes.

Mitug-an si Ibanez nga aduna pa gyuy ubay-ubay nga wa pa mahibawo sa hustong paggamit sa bike lanes.


Source: Sun.Star Superbalita (https://www.sunstar.com.ph/article/1859555/Superbalita-Cebu/Balita/Mandaue-namutang-og-bike-lanes?ref=rss&format=simple&link=link)

No comments