Recent Posts

Breaking News

Mandaue City magpatabang pagtukod og ilang morge


NANGAYO og tabang sa Kagamhanan sa Probinsya sa Sugbo si Mandaue City Councilor Nerissa Soon-Ruiz sa tinguha nga makatukod ang Dakbayan og mortuary freezer o morge.

Panagana kini kon managhan ang mga lawas nga di maato sa pag-cremate gilayon sa mga punerarya sa Siyudad sa Mandaue.

Sa pakighinabi sa Superbalita Cebu kang Ruiz, siya niingon nga moduso siya og resolusyon ngadto sa Probinsya o kang Gobernador Gwendolyn Garcia pinaagi kang Provincial Board Member Glenn Soco. Dugang ni Ruiz nga nagkahisgotay na sila ni Soco ug andam motabang ang board member sa 6th district sa Sugbo.

Si Soco nisaad kaniya nga siya maoy moduso og resolution ngadto sa Provincial Board alang niini.

“I asked if they can provide us a refrigerated morgue. Even a refrigerated containerized van will do to ease the hospital morgues now,” sigon ni Ruiz.

Niadtong miaging semana, niduso si Ruiz sa iyang resolution ngadto sa Mandaue City Council nga maghimo og kaugalingong morge ang dakbayan.

Gisuportahan kini sa iyang kaubang mga konsehal.

Karon, malaumon si Ruiz nga tabangan siya sa Probinsya tungod sa nagkadaghang kaso ug daghan na ang nangamatay sa coronavirus disease (Covid-19).

Dili lang mga namatay sa Covid-19 ang mga na-cremate, apan lakip sab ang gidudahang namatay sa mao nga sakit, nga kinahanglan sab i-cremate.

Kini ang hinungdan nga taas ang linya sa mga cremation ug dugay ang schedule. Samtang naghuwat sa schedule ug aron ma-preserve ang lawas, kinahanglan kini ibutang sa morge.

Nahinumdom si Ruiz nga niadtong unang mga buwan sa Covid-19 sa nasod, ang mga patayng lawas sa mga punerarya sa Metro Manila gibutang na lang sa mga hallway tungod kay puno na ang mga morge.

Pinaagi sa pagtukod sa kaugalingong morge sa Dakbayan, makapangandam kini kon managhan ang mga nangamatay.

“If you remember, I have three resolutions. Usa na ni ang morgue, crematorium and new cemetery. So, at least, masulbad ning usa, ang duha na lang,” sigon ni Ruiz. (KFD)


Source: Sun.Star Superbalita (https://www.sunstar.com.ph/article/1861997/Superbalita-Cebu/Balita/Mandaue-City-magpatabang-pagtukod-og-ilang-morge?ref=rss&format=simple&link=link)

No comments