Recent Posts

Breaking News

Mama, anak kritikal giluba sa ilang silingan


AMAHAN ug anak kritikal human giluba sa ilang silingan niadtong miaging Sabado sa gabii sa Baranay. Azusina, lungsod sa Barili.

Si Byllie Gonzaga, 61, minyo mag-uuma kritikal nga naa sa Vicente Sotto Memorial Medical Center (VSMMC), kritikal sab iyang anak nga si Cresilda Cabusas, 37, minyo mag-uuma.

Nasikop sa kapulisan si Raymundo Limbaga, Jr,. 52, minyo, mag-uuma dapit.

Si Police Master Sgt. Mark Anthony Fat sa Barili Police Station nga nahinabi sa Superbalita Cebu nagkanayon nga bangi sa mga umagad nila ni Gonzaga ug Limbaga nga nagnilabanay ang ilang pamilya.

Matud ni PMS Fat, nga ang umagad ni Gonzaga nga si Jomar Cabusas, nangayo og abag niini dihang pasulong kini mopalit og feeds alang sa mga binuhing hayop naaugatan niya ang suspek nga si Limbaga nga nagdala og plamingko.

Sa kahadlok ni Cabusas, mikaratel sa pagdagan misumbong sa iyang ugangan nga nagbitbit si Limbaga og plamingko.

Si Gonzaga nagkuha sab og plamingko gisugat gilayon si Limbaga, ug nahitabo ang dinunggabay sa duha.

Si Gonzaga nakaangkon og daghang samad sa iyang kalawasan hinungdan nga kritikal.

Si Limbaga nakaangkon og gamayng samad sa iyang bukobuko.

Ang anak ni Gonzaga nga si Cresilda nga nakakita sa dinunggabay miuwang apan giapil siya sa pagdunggab sa suspek makadaghang higayon.

Si Limbaga niangkon sa krimen apan mipasabot nga dili niya tuyo nga manulong sa panimalay sa mga Gonzaga.

Gibutyag niini nga gikan siya sa uma nagbitbit sa plamingko ug ubang gamit niini.

Gipadayag niini nga makig-estorya lang unta siya sa pamilyang Gonzaga tali sa bangi sa iyang umagad.

Apan gilahi sa pagsabot ni Jomar Cabusas, ang ilang panagsugat ug kini nagpahaba ngadto sa ugangan nga si Gonzaga, hinunugdan nga gisugat siya sa dalan ug nahitabo ang ilang dinunggabay.

Kasong frustrated homicide ang giandam sa kapulisan batok ni Limbaga. (GPL)


Source: Sun.Star Superbalita (https://www.sunstar.com.ph/article/1861883/Superbalita-Cebu/Balita/Mama-anak-kritikal-giluba-sa-ilang-silingan?ref=rss&format=simple&link=link)

No comments