Recent Posts

Breaking News

Luag nga trapiko, pagtuman sa health protocol naobserbahan sa kapulisan


MALINAWON, hapsay ang dagan sa trapiko kay disiplinado ang mga Sugboanon.

Mao kini ang naobserbahan ni Police Regional Office (PRO)7 Director Police Brigadier General Albert Ignatius Ferro, sa iyang paglibot sa mga dapit sa Dakbayan sa Sugbo.

Nakadayeg si Ferro sa mall management kay ang ilang security personnel estriktong nagpatuman og social distancing, pagpasul-ob og face mask.

Gawas niini, duna pay markings sa mga tawo nga maglinya aron mamintinar ang social distancing.

Duna sab silay thermal gun nga gigamit pag-check sa temperatura sa tanang manulod.

“Actually, I was highly empressed by the Cebuano cooperation because if you go to the malls, there are markings sa tanan sa mga agianan. One way in, one way out lang. So, it was nice that they are also conscious,” matod ni Ferro.

Nabantayan usab sa heneral nga bisan gipangtugotan na ang ubang mga pribadong sakyanan nga makabyahe, wa pa sila makasugat og problema sa dagan sa trapiko sa mga nag-unang kadalanan sa Dakbayan sa Sugbo.

Nagpasabot kini nga ang mga tawo misunod sa gipatuman nga lagda sa general community quarantine.

Nagtuo siya nga kon kini magpadayon, taas kaayo ang posibilidad nga malatasan sa mga Sugboanon ang hulga sa coranavirus disease.

“The traffic as what i have observed, although naay light to moderate, pero wala pa koy nakita, kanang heavy traffic. So far, we hope to have a more manageable traffic condition,” dugang ni Ferro.

Libreng sakay

Gipahibawo usab niya ang ilang libreng sakay program nga una nang gisugdan atol sa unang adlaw sa ECQ niadtong Marso 17.

Dugang ni Ferro nga kadtong mga tawo nga nag-atang sa kilid sa karsada nga way kasakyan, tanyagan kini og libreng sakay ug ihatod sa ilang distinasyon. (AYB)


Source: Sun.Star Superbalita (https://www.sunstar.com.ph/article/1858788/Superbalita-Cebu/Balita/Luag-nga-trapiko-pagtuman-sa-health-protocol-naobserbahan-sa-kapulisan?ref=rss&format=simple&link=link)

No comments