Recent Posts

Breaking News

LGU Panabo: 3 ka bulan nga renta di pabayran


PANABO CITY, Davao Del Norte -- Libre ang bayrunon sulod sa tulo ka bulan sa mga establisemento nga iya sa gobyerno kini human nga giaprobahan ni Panabo City Mayor Jose Relampagos ang City Ordinance 10-2020 nga naghatag og pagtugot sa mga nag-renta nga dili pabayran ang ilang rental fee gikan sa Marso 16, 2020 hangtud sa Mayo 31, 2020.

Matud pa nga tumong sa ordinansa nga maminusan ang bayrunon sa tanan nga nag-renta og pwesto sa Panabo Premiumed Market (Wet Market), Panabo Central Market, Panabo Business Center (ang kanhi food Centrum) ug Panabo City Bus and Jeepney Terminal nga apektado sa state of calamity tungod sa coronavirus disease (Covid-19).

Nalatid sab matud pa sa Section 5 sa ordinansa nga ang tanan nga mibayad nga operational ug non-operational nga mga establisemento o stalls sa bulan sa Marso hangtud Mayo, 2020 mahimong advance payment nalang kadto alang sa bulan gikan sa Hunyo.

Dugang pa nga ang mga surcharges ug mga penalties sugod Marso 16, 2020 hangtud sa Disyembre 31, 2020 dili usab pabayran apan, ang bayrunon sa tubig ug kuryente kinahanglan nga bayran.

Gikalipay og dako labi na sa mga gagmay'ng negosyante ang maong ordinansa nga gimugna sa lokal nga kagamhanan sa siyudad sa Panabo sanglit alang kanila nakatabang kini'g dako labi na sa gisagubang nga krisis dala sa pandemic. (Dexter T. Visitacion)


Source: Sun.Star Superbalita (https://www.sunstar.com.ph/article/1858684/Superbalita-Davao/Balita/LGU-Panabo-3-ka-bulan-nga-renta-di-pabayran?ref=rss&format=simple&link=link)

No comments