Recent Posts

Breaking News

Lalakeng magsuon nalumos


DUHA ka mga lalake nga managsuon ang nalumos sa kadagatan sa Barangay Guiwanon, lungsod sa Ginatilan ug napalgan kagahapon sa buntag, Hunyo 11.

Giila sila nga si Hazel Kadusale, 28, ulitawo, ug Lord Francis SareƱo, 38, minyo, pu los taga Barangay Malutbu.

Si Police Corporal Jayson Lobendena sa Ginatilan Police Station nga nahinabi sa Superbalita Cebu nagkanayon nga alas 10:15 sa gabii Hunyo 10, 2020, nakadawat sila og tawag gikan ni Jade Momo ug kini nipahibalo nga dunay managsuong nangalumos.

Ang mga pulis, mga sakop sa Bureau of Fire Protection (BFP), ug mga boluntaryo wa na nila mapalgi ang managsuon tibuok gabii nga gisuhid ang kadagatan sa Guiwanon.

Gibutyag niini nga managsuon uban sa laing mga mananagat namana sa maong dapit kalit nga nahanaw kay naanod sa kusog nga sulog tubig sa dagat.

Si Guiwanon Barangay Kapitan Mitchelyn Momo nagkanayon nga hilan ang dapit kay moabot na sa lima ka mga tawo ang nalumos.

Sumala niini nga si Icy, igagaw ni Hazel, maoy namana sa maong dapit, hunas pero nagbawodbawod kay dili maayo ang panahon.

Duna say ubang mga residente nga nanginhas alas 7:00 sa gabii kay hunas ang dapit.

Ang ig-agaw nga si Icy kalit nga miabot sa ilang panimalay dili layo sa nahitaboan nga si Hazel, iyang ig-agaw, kalit lang nawala samtang namana sila.

Nakita niini ang flashlight sa ilawom sa dagat mga 15 ka dupa pero wala man iyang igagaw nangayo siya og tabang.

Matod ni Momo, nitawag dayon sila sa taga PNP, BFP ug mga silingan nila miadto sa dapit aron pagsalbar ni Hazel.

Naabot sab ang igsuon nga si Lord Francis nga miuban sa taga PNP, BFP, ug ang ig-agaw nga si Icy.

Nakita nila ang flashlight nga nagsuga pa sa ilawom, ang igsuon nga si Lord Francis, gitambagan sab nga maghikot og pisi para dili maanod sa sulog pero wa mosanong misawom kay mangita na siya sa iyang igsuon.

Pero wa magsilbi ang ilang pagsalbar kay bawod, unya kusog ang sulog sa tubig sa dagat ug wa silay nakit-an.

Misamot ang kabalaka sa mga misalbar kay si Lord Francis, sukad sa pagsawom niini, wa na sab motatim-aw hinungdan nga mangayo sila og abag sa mga pribadong diver apil na si Stephen Seymour, Canadian, nga nakabasi sa Brgy. Dalahikan, lungsod sa Samboan.

Ang ilang search and retrieval operation naabtan Huwebes na sa buntag. Gibutyag niini nga kantilado ang maong dapit dili layo sa sanctuary maong daghang dagkong isda.

Apan ang ilang mga mananagat nga tagadiha sauna pa nga dili managat, mamana sa maong dapit kay nahadlok sila kay dunay kalibulongan nga mamira sa ilawom sa dagat nga dili nila maesplikar.

Ang sulti sab sa ilang mga katiguwangan nga ang ilawom sa dagat sa maong dapit dunay nagpuyo nga usa ka dakong sea turtle, dako padaw ni sa nigo nga dunay korona.

Daghan daw ang nakakita niini, maong mahadlok sila. Sumala pa daghang nagsugyot nila sa lokal nga opisyal nga ilang himuong restricted o gidili ang maong dapit tungod kay delikado niini. / GPL


Source: Sun.Star Superbalita (https://www.sunstar.com.ph/article/1859849/Superbalita-Cebu/Balita/Lalakeng-magsuon-nalumos?ref=rss&format=simple&link=link)

No comments