Recent Posts

Breaking News

Konsehal mohithit og shabu?


NAKATAKDA nga ihatud karon sa korte alang sa summary inquest proceedings ang usa ka municipal councilor sa Kiblawan, Davao del Sur ug ang duha ka kauban niini human sila nasikop gumikan giingong nag-shabu session, Sabado sa buntag, Hunyo 13, 2020, sa Larayan 2000 sa Bankerohan Public Market, Davao City.

Pinaagi sa spot report sa San Pedro Police Station ang nga dinakpan gipang-ila nga sila si Kiblawan, Davao del Sur Municipal Councilor Cipriano Ponce Sarona, 53-anyos; ug ang kauban niini nga sila Butch Eltagonde Amarillo, 38-anyos, driver sa Municipality of Kiblawan (job order); ug si Archie Napoles Truya, 31-anyos, harvester, taga Los Amigos, Tugbok District, Davao City.

Ang maong puwesto girentahan ni Sarona tungod kay ga-negosyo kini og mangga. Si Sarona ug Amarillo suma sa Davao City Police Office (DCPO) mga High Value Target (HVT) gumikan sa pagka-konsehal niini sa lungsod ug drayber sa gobyerno si Amarillo.

Na-recover ang upat ka mga pakite sa gituohang shabu ug mga drug paraphernalia sa mga dinakpan suma sa kapulisan.

Kasong pagsupak sa Republic Act 9165 kon Comprehensive Dangerous Drug Act of 2002 ang ipasaka nga kaso sa mga dinakpan didto sa korte.

Sukad sa pagsuwat ning balita, temporaryo nga gikustodiya sa San Pedro PNP ang mga nahisgutan samtang ginahulat ang resulta sa ilang drug test.


Source: Sun.Star Superbalita (https://www.sunstar.com.ph/article/1860059/Superbalita-Davao/Balita/Konsehal-mohithit-og-shabu?ref=rss&format=simple&link=link)

No comments